საკრებულოში ყოველწლიური მოხსენებით გამოსვლისას, თბილისის მერს, დავით ნარმანიას კითხვა დაუსვეს მოსამართლე ნაზღაიძის ძმისთვის კომპენსაციის გადაცემის საკითხზეც. ნარმანია აღნიშნულ საკითხს ოპონენტების მერ აგორებულად მიიჩნევს:

"ეს (ნაზღაიძის საქმე) ოპონენტების მიერ სპეციალურად შექმნილი სახელია. ჩემთვის ეს არის მოქალაქე ჩოხელის საქმე.

როცა მოქალაქემ მოგვმართა, ჩვენ შესაბამისი წესებისა და პროცედურების დაცვით მივიღეთ გადაწყვეტილება აღნიშნული, მართლაც ძალიან დაზარალებული მოქალაქის ტერიტორიის მონაცვლეობასთან დაკავშირებით და დანაკლისის კომპენსირებასთან დაკავშირებით. ის, თუ მას სხვა ვინმესთან რა ვალდებულებები ჰქონდა და რა პასუხისმგებლობა ჰქონდა, ეს არის მეორე საკითხი, რაც არსებითად მნიშვნელოვანი ჩვენთვის არ ყოფილა.

რატომღაც არავის გახსენებია, რომ იმავე წესით ჩვენ ადგილი მოვუნაცვლეთ მოქალაქე ელიზბარაშვილებს, რომელთაც იმაზე მეტი ტერიტორია მოუნაცვლდათ, ვიდრე მოქალაქე ჩოხელს მიეცა საერთო ჯამში.

თუ ჩვენ არ მივცემდით, ჩვენი ოპონენტები იტყოდნენ, რომ დაზარალებულია მოქალაქე, მერია არ აძლევს მოქალაქეს, მოქალაქე არის დაჩაგრული და ა.შ.

ჩვენ დარწმუნებული ვართ, რომ მოვიქეცით კეთილსინდისიერად. გვერდში დავუდექით დაზარალებულ მოქალაქეს.

ასე რომ, თუ ვინმეს რაიმეში ეპარება ეჭვი, საკითხი შესაბამისი გამოკვლევისთვის არის სამართალდამცავ ორგანოებში. ნუ ვიჩქარებთ, დაველოდოთ სამართალდამცავი ორგანოების მიერ გამოტანილ დასკვნას."

თბილისის საკრებულოს ოპოზიციური პარტიების დეპუტატებმა საჯარო რეესტრიდან საქმესთან დაკავშირებული დოკუმენტები და ხელშეკრულებები შეისწავლეს. მათი მტკიცებით, რუსთავი 2-ის საქმის მოსამართლის, ნატა ნაზღაიძის ძმამ, ზვიად ნაზღაიძემ, ვერეს ხეობაში 13 ივნისის სტიქიით გამოწვეული ზარალის ასანაზღაურებლად, მილიონი ლარი იმ მიწის ნაკვეთისთვის მიიღო, რომელიც იმ დროისთვის საქართველოს ბანკს ეკუთვნოდა და რომლის ღირებულებაც რეალურად 23 ათას ლარს შეადგენდა. ოპოზიცია ამტკიცებს, რომ რეალურად, ხელისუფლებამ მოსამართლე ნაზღაიძის ოჯახის წევრს ქონება იმიტომ გადასცა, რომ მოსამართლეს მათი სასარგებლო გადაწყვეტილება მიეღო რუსთავი 2-თან დაკავშირებით. საქმეზე კვლევა ჩაატარა საქართველოს ახალგაზრდა იურისტთა ასოციაციამაც. მათი თქმით, საქმეში არსებული ეჭვები საკმარისია გამოძიების დასაწყებად.