თბილისის საზოგადოებრივი ტრანსპორტის სისტემას 23 ახალი სამარშრუტო ხაზი დაემატება, 53 უკვე არსებული მარშრუტი კი შეიცვლება ახლით. ჯამში 76 სამარშრუტო ხაზზე 1 000 ახალი მიკროავტობუსი იმოძრავებს.

ამ ეტაპზე თბილისში 465 ახალი, ლურჯი მიკროავტობუსი მოძრაობს. დღეიდან, 20 იანვრიდან დაიწყება ჯერ კიდევ მოძრავი ძველი, ყვითელი მიკროავტობუსების ჩანაცვლება და 1-ლი თებერვლიდან დედაქალაქში არცერთი ყვითელი მიკროავტობუსი აღარ იმოძრავებს. ამის შესახებ თბილისის მერმა, კახა კალაძემ ახალი მიკროავტობუსების წარდგენისას განაცხადა.

"დღეს უკვე მიკროავტობუსები მთლიანად განახლებული, მოწესრიგებულია. ყვითელი მკროავტობუსი, რომელი ამდენი წლის განმავლობაში ემსახურებოდა თბილისის მოსლხლეობას, მათ რეალური მდგომარეობა არის ძალიან მძიმე. პრობლემას ქმნიდა ჰაერის დაბინძურების თვალსაზრისით და გარკვეულ დისკომფორტს ქმნიდა, იმიტომ, რომ ყველანაირი რესურსი ამოწურული ჰქონდა.

დღეიდან დედაქალაქს მოემსახურება ახალი, განახლებული, მოწესრიგებული, ევროპული ტიპის მიკროავტობუსი, რაც ძალიან მნიშვნელოვანია და კომფორტული იქნება გადაადგილება", — ამბობს კალაძე.

გარდა ამისა, კალაძემ აღნიშნა, რომ მიმდინარეობს ინფრასტრუქტურული სამუშაოები ახალი საავტობუსე ზოლების მოსაწყობად. დედაქალაქის მერი ამტკიცებს, რომ მალე თბილისში არცერთი უბანი და ქუჩა არ იქნება, სადაც საზოგადოებრივი ტრანსპორტი არ იმოძრავებს.