სირიაზე იერიშის მიტანიდან ერთი კვირაც არ გასულა და ამერიკის პრეზიდენტი დონალდ ტრამპი ტვიტერზე აცხადებს, რომ ჩრდილოეთ კორეის პრობლემას ჩინეთის დახმარების გარეშეც გადაჭრის:

"ჩრდილოეთ კორეა ხიფათს ეძებს. თუ ჩინეთი დახმარებას გადაწყვეტს, ძალიან კარგი იქნება. თუ არა, ამ პრობლემას მათ გარეშეც გადავწყვეტთ. აშშ".

ტრამპი ამ განცხადებით, ჩრდილოეთ კორეის მუქარას გამოეხმაურა.

CNN-ის ინფორმაციით, ჩრდილოეთ კორეა ამერიკის საზღვაო ჯგუფის მის რეგიონში განლაგებას გამოეხმაურა და განაცხადა, რომ ის შეეწინააღმდეგება აგრესიის ამ გამოვლინებას ნებისმიერი მეთოდებით, "რომელიც ამერიკას სურს რომ მიიღოს".

ფხენიანში განაცხადეს, რომ ამერიკის მიერ შექმნილმა სიტუაციამ ჩრდილოეთ კორეის მხრიდან "თავდაცვაზე ორიენტირებული" ბირთვული იარაღის შექმნაზე მუშაობა გაამართლა.