თბილისის მერმა საკრებულოში ანგარიშის წარდგენა რამდენიმე წუთის წინ დაიწყო. ანგარიში სულ 74-გვერდიანია და თითქმის ნახევარი ფოტოილუსტრაციაა. მერმა ანგარიშს ის ფოტოები დაურთო, რომლიც შესრულებულ საქმიანობას ასახავს.

ანგარიში რვა თავისგან შედგება. მასში მერმა თავი მოუყარა 2016 წელს ინფრასტრუქტურისა და მშენებლობის; მუნიციპალური ტრანსპორტის; დასასვენებელი, სპორტულ-გამაჯანსაღებელი, მწვანე გარემოს; ჯანდაცვისა და სოციალური უზრუნველყოფის; ბავშვებისა და ახალგაზრდობის ხელშეწყობის; კულტურისა და სპორტის; ეკონომიკისა და ბიზნესის; საქმიანობის ეფექტურობის ამაღლების და გამჭვირვალობის კუთხით გადადგმული ნაბიჯების შესახებ ინფორმაციას. ანგარიშის სარჩევში ვერ მოხვდა, თუმცა, ბოლო 11 გვერდი დაეთმო თბილისის რაიონულ გამგეობებს.

"დაფიქსირდა გადასახადების საკასო შესრულების უპრეცედენტოდ მაღალი - 99 პროცენტიანი მაჩვენებელი," - ვკითხულობთ ანგარიშის პირველივე გვერდებზე.

დოკუმენტის ფინანსური ნაწილიდან ირკვევა, რომ ბიუჯეტიდან ყველაზე დიდი ნაწილი, თითქმის 25 პროცენტი - 208 503,8 ათასი ლარი ჯანმრთელობის დაცვისა და სოციალური მომსახურების უზრუნველყოფას მოხმარდა, ყველაზე ნაკლები 820,9 ათასი კი - ეკონომიკის განვითარების ხელშეწყობას. ბიუჯეტიდან თითქმის 10 პროცენტი - 84 289,3 ათასი ლარი ეკოლოგიური მდგომარეობის შენარჩუნებასა და გაუმჯობესებაზე დაიხარჯა.