ინგლისის ქალაქ ბირმინგჰემში გადაღებული საოცარი ფოტო, რომელშიც ქალი მშვიდი ღიმილით დაჰყურებს მემარჯვენე პარტიის ლიდერს დემონსტრაციის დროს, მთელ მსოფლიოში ძალიან მალე გავირუსდა.

უამრავმა ინტერნეტმომხმარებელმა ფოტო რასიზმის მიმართ წინააღმდეგობის სიმბოლოდ შეაფასა.

დემონსტრაცია, რომელიც მემარჯვენე ძალის, ინგლისის თავდაცვის ლიგის, მიერ იყო ორგანიზებული, ისლამს ავტორიტარულ რელიგიად აღწერს. აქციაზე, რომელზეც ამ იდეის ასამდე მხარდამჭერი გამოვიდა, პოლიცია იყო მობილიზებული.

სიფია ხანი დაჰყურებს ინგლისის თავდაცვის ლიგის აქტივისტს იან კროსლენდს, ბირმინგჰემის დემონსტრაციის დროს. ინგლისი. 2017 წლის 10 აპრილი.

ფოტო: Joe Giddens / AP

დემონსტრაცია თავდაპირველად მშვიდად მიმდინარეობდა, როდესაც მოულოდნელად AP-ის ფოტოგრაფმა ჯო გიდენსმა დაინახა, რომ აქციის ორგანიზატორი იან, კროსლენდი დემონსტრანტების ტალღას მიარღვევდა. ფოტოგრაფის თქმით, ამ დროს ასევე შენიშნა გამვლელი გოგო შარფით, რომელმაც შემდეგი სიტყვები ხმამაღლა თქვა: "ნაცისტები" და "სიტყვის თავისუფლება".

აქციაზე ვითარება სწრაფად შეიცვალა.

ფოტოგრაფმა Time-ს უთხრა, რომ მემარჯვენე ძალის ლიდერი თავის თითს გოგოს სახისკენ იშვერდა, რომელსაც თავის მხრივ პოლიცია იცავდა და დემონსტრანტების ტალღიდან მშვიდად გაყვანას ცდილობდა. სწორედ ამ დროს, მან რამდენიმე ფოტო გადაიღო და ახალი მიმართულებით გადაინაცვლა.

"სურათით კმაყოფილი ვიყავი - იქ ერთად იყვნენ აქციის მონაწილე, პოლიცია და ის, ვინც აქციის იდეას აპროტესტებდა. თუმცა, სანამ მათი სხეულის ენას კარგად არ დავაკვირდი, მანამდე ვერც მივხვდი, როგორი წარმატებული სურათი გადავიღე. სურათს ძალას ამ ქალის სახის გამომეტყველება სძენს" - ამბობს ფოტოგრაფი, რომელიც დასძენს, რომ არ იცოდა ფოტოს გავირუსების შესახებ, სანამ კოლეგამ პოსტზე არ მონიშნა.

"როდესაც სურათს იღებ, ხშირად წინასწარ იცი, რომ ის პოპულარული გახდება. ეს ფოტოები ამ შემთხვევას არ მიეკუთვნებიან".