შვილის სამეცადინოდ კარანტინში მასწავლებელივით გამოვეწყე

ქეით ბლანშეტი დღეს ჰოლივუდში ერთ-ერთი ყველაზე ცნობილი და აღიარებული მსახიობია, რომელსაც მაყურებელი კარგად იცნობს ერთმანეთზე უფრო წარმატებული როლებით ფილმებში ბეჭდების მბრძანებელი, ქეროლი, ავიატორი და ბლუ ჟასმინი. მათ შორის ამ ბოლო ორი ფილმით ოსკარი ორჯერ მოიპოვა.

2020 წელს განვითარებულმა მოვლენებმა მას ერთი განსაკუთრებული როლის მორგებისკენაც უბიძგა, თუმცა, სამწუხაროდ, მის ნახვას ჩვენ ვერ შევძლებთ.

პანდემიის გამო დანარჩენ მსოფლიოსთან ერთად ქეით ბლანშეტის ოჯახიც გარკვეული პერიოდი მკაცრ იზოლაციაში იყო, რის გამოც მის 7 წლის შვილს, სახელად ედითს, სკოლის გაკვეთილებზე დასწრება დისტანციურად უწევდა.

შეცვლილი გარემოებების გამო ედითს მეცადინეობა უჭირდა, ამიტომ დედამისს განსაკუთრებული ხერხების გამოყენება მოუხდა.

"მეცადინეობის უფლებას იქამდე არ მაძლევდა, სანამ მისი მასწავლებელივით არ ჩავიცვამდი და ხმასაც ისევე არ დავიყენებდი. თანაც მხოლოდ ჩემს შვილს კი არა, მისი სათამაშო ცხოველების არმიასაც ვასწავლიდი", — სიცილით იხსენებს ქეით ბლანშეტი.

52 წლის მსახიობი ოთხი შვილის მშობელია და მისი თქმით, სახლში მეცადინეობის გამოცდილებამ მან მასწავლებლების შრომა უფრო მეტად დააფასებინა.

"სახლში გატარებულმა იმ პერიოდმა დამანახა, რა საოცრებებს სჩადიან მასწავლებლები. ლამის წარმოუდგენელია, ხშირად სრულიად გულგრილი 30 მოსწავლის წინაშე კლასში წარსდგე და ისინი შუა საუკუნეების ისტორიით დააინტერესო".

ქეით ბლანშეტი და ბრედლი კუპერი ფილმში *Nightmare Alley*.

ფოტო: KERRY HAYES

ქეით ბლანშეტის მონაწილეობით სულ მალე გამოვა გილერმო დელ ტოროს ახალი ფილმი Nightmare Alley (კოშმარების ხეივანი), რომელშიც მასთან ერთად ასევე მონაწილეობენ ბრედლი კუპერი, რუნი მარა და ტონი კოლეტი.

ეს გილერმო დელ ტოროს პირველი ფილმია მას შემდეგ, რაც მისი Shape of Water (წყლის ფორმა) ოსკარებზე საუკეთესო კინოსურათად დასახელდა.

რაც შეეხება კოშმარების ხეივანს, ის ამერიკელი მწერლის უილიამ ლინდსი გრეშემის 1946 წელს გამოქვეყნებულ ამავე სახელწოდების რომანს ეფუძნება, რომლის სიუჟეტიც 40-იან წლებში ვითარდება და ქეით ბლანშეტი მასში ფსიქოანალიტიკოსის როლით მოგვევლინება.