უზბეკური წარმოშობის რუსეთის მოქალაქე, 22 წლის აკბარჯონ ჯალილოვი, რომელმაც პეტერბურგის მეტროში 3 აპრილს თავი აიფეთქა, 2016 წლის დეკემბერში თურქეთიდან იყო დეპორტირებული. ამის შესახებ ინფორმაციას თურქული მედია ავრცელებს.

თურქული მედიის ცნობით, ჯალილოვი თურქეთში 2015 წელს უპრობლემოდ შევიდა, რადგან ის არანაირ შავ სიაში არ იყო შესული. ჯალილოვი ქვეყნიდან 2016 წლის დეკემბერში თურქეთში ყოფნის ვადების დარღვევის გამო გააძევეს.

როგორც Reuters იტყობინება, ჯალილოვი წარმოშობით უზბეკეთიდან იყო, ის რუსეთში სამუშაოდ რამდენიმე წლის წინ ჩავიდა და თურქეთში გამგზავრებამდე დაბალანაზღაურებად სამსახურებში მუშაობდა. მის ბიოგრაფიაში ამ დრომდე რადიკალურ ისლამთან, ან ტერორიზმთან რაიმე კავშირი არ ჩანს.

უცნობია, თუ რას საქმიანობა აკბარჯონ ჯალილოვი თურქეთში ერთი წლის განმავლობაში. ცნობილი ფაქტია, რომ რადიკალი ისლამისტები თურქეთის ტერიტორიას იყენებენ სირიაში გადასასვლელად. თუმცა, ამ ეტაპზე უცნობია, ჯალილოვს კონკრეტულად ჰქონდა თუ არა ვინმესთან კავშირში.

3 აპრილს, პეტერბურგის მეტროში მომხდარ აფეთქებას 14 ადამიანი ემსხვერპლა, ათეულობით კი დაიჭრა.