შემწეობის მიმღებთა რაოდენობამ მორიგ რეკორდულ ნიშნულს მიაღწია. დეკემბრის მდგომარეობით, სოციალური დახმარება 643 167 ადამიანმა მიიღო, რაც საქართველოს მოსახლეობის 17,2%-ია. აღსანიშანავია, რომ სიღარიბის ზღვარს ქვემოთ მყოფი მოსახლეობის რაოდენობა ყოველთვიურად მზარდია.

სოციალური შემწეობის მიმღებთა რაოდენობა ბოლო ერთ წელში 23%-ით, ანუ 118 569 ადამიანით არის გაზრდილი. როგორც სტატისტიკაშია აღნიშნული, დეკემბერში დახმარება საქართველოში მცხოვრებმა 174,379-მა ოჯახმა მიიღო.

რეგიონების მიხედვით შემწეობის მიმღებთა რაოდენობა ასე ნაწილდება:

  1. თბილისი — 130 748 ადამიანი;
  2. იმერეთი — 83 563 ადამიანი;
  3. ქვემო ქართლი — 77 681 ადამიანი;
  4. სამეგრელო-ზემო სვანეთი — 75 830 ადამიანი;
  5. აჭარის ავტონომიური რესპუბლიკა — 70 617 ადამიანი;
  6. კახეთი — 65 880 ადამიანი;
  7. შიდა ქართლი — 58 452 ადამიანი;
  8. გურია — 27 604 ადამიანი;
  9. სამცხე-ჯავახეთი — 19 393 ადამიანი;
  10. მცხეთა-მთიანეთი — 18 763 ადამიანი;
  11. რაჭა-ლეჩხუმი და ქვემო სვანეთი — 14 636 ადამიანი.

დეკემბერში სოციალური შემწეობის მიმღებთათვის 44 030 711 ლარი გადაირიცხა. გასული წლის იმავე თვეში ამ პროგრამის ბიუჯეტი 29 457 940 ლარი იყო — შესაბამისად, ბოლო ერთი წლის ჭრილში სოციალურად დაუცველებისთვის გადარიცხული თანხის მოცულობა 49%-ით, ანუ 14 572 771 ლარით არის გაზრიდლი.

რამდენიმე თვის წინ პრემიერმინისტრმა, ირაკლი ღარიბაშვილმა განაცხადა, რომ არსებული სოციალური პოლიტიკის ფარგლებში მოქალაქეები "უმუშევრობას, უმოქმედობას და სიღარიბეს" შეაჩვიეს. ის შრომისუნარიანი სოციალურად დაუცველი ადამიანების დასაქმების ინიციატივით გამოვდა.

პრემიერმინისტრმა სიღარიბის დაძლევის შესახებ გუშინ, 11 იანვარს გამართულ მთავრობის სხდომაზეც ისაუბრა და თქვა, რომ წელს მთავრობის საზრუნავი ახალი სამუშაო ადგილების შექმნა და სიღარიბის შემცირება იქნება. ღარიბაშვილის თქმით, ისინი შექმნიან ათიათასობით ახალ სამუშაო ადგილს.