ქირურგმა საიმონ ბრამჰოლმა აღიარა, რომ 2013 წელს სპეციალური აპარატი გამოიყენა, რომელსაც ოპერაციისას ორგანოებზე სისხლდენის შესაჩერებლად ან კონკრეტული ნაწილის მოსანიშნად იყენებენ, რათა უგონო პაციენტის ღვიძლზე თავისი ინიციალები ამოეწვა. სამედიცინო სფეროს წარმომადგენლებმა ქირურგის ქმედება "პროფესიულ ამპარტავნებად" შეაფასეს, რომელიც ექიმების მიმართ საზოგადოების ნდობას "ძირს უთხრის".

2017 წელს ბრამჰოლმა სასამართლოს წინაშე პაციენტის ღვიძლზე ინიციალების ამოწვის ორი ფაქტი აღიარა და 14 ათასი დოლარით დაჯარიმდა. 2021 წლის დეკემბერში სასამართლომ ქირურგისთვის პროფესიული საქმიანობის 5 თვით შეჩერება გადაწყვიტა, თუმცა რადგან ის პროფესიონალურ სტანდარტებს აღარ არღვევდა, გასულ ორშაბათს მისი ნასამართლობა შეჩერდა და საქმიანობის შეწყვეტის ბრძანებაც გაუქმდა.

ფოტო: Alamy

დიდი ბრიტანეთის გენერალურმა სამედიცინო საბჭომ სასამართლოს გადაწყვეტილება გააპროტესტა და განაცხადა, რომ ბრამჰოლის ქმედებებმა პაციენტსა და ექიმს შორის ნდობის ფაქტორს სერიოზული პრობლემები შეუქმნა.

მიუხედავად იმისა, რომ პაციენტებს ხანგრძლივი ფიზიკური ზიანი არ მიუღიათ, სამედიცინო საბჭოს თქმით, ბრამჰოლის ქმედებებმა ერთ-ერთ მათგანს "მნიშვნელოვანი ემოციური ზიანი" მიაყენა. საბჭოს წევრებმა ქირურგი სამედიცინო საზოგადოებიდან გარიცხეს და განაცხადეს, რომ მიუხედავად ბრამჰოლის პროფესიონალიზმისა, ეს გადაწყვეტილება მისი ქმედების პროპორციული სანქციაა, რადგან მან "პაციენტების ღირსება შელახა".