ნაციონალური მოძრაობის დეპუტატი, რომან გოცირიძე აცხადებს, რომ პარტია აქტიურად უნდა ჩაერთოს საპარლამენტო საქმიანობაში, ან საერთოდ დატოვოს საკანონმდებლო ორგანო. მისი შეფასებით არსებული მოცემულობა — ბოიკოტის რეჟიმში ყოფნა — ყველაზე უარესი მდგომარეობაა. გოცირიძის შეფასებით, ამ გადაწყვეტილებით ბოლო წლებში "სრულ კომფორტში" ამყოფეს ქართული ოცნება.

"მიდგომა, რომ ერთჯერადად შევალთ კონსტიტუციასთან დაკავშირებულ კენჭისყრაზე ან მხოლოდ დროებითი საგამოძიებო კომისიის მუშაობაში მივიღებთ მონაწილეობას, არის არსებული, ყველაზე უარესი მდგომარეობის შენარჩუნების ნაირსახეობა.

ან პარლამენტიდან ბრძოლა და მისი ბერკეტების ( მათ შორის საერთაშორისო) მაქსიმალურად გამოყენება, ან ამ ბერკეტების გამოყენებაზე უარის თქმა მოსალოდნელი შედეგებითურთ და სათანადო პასუხისმგებლობის გაზიარებით-ესაა ჩემი პოზიცია", — წერს გოცირიძე სოციალურ ქსელში.

გარდა ამისა, ის აღნიშნავს, რომ ამ საკითხზე მისი პირადი პოზიციის მიუხედავად, დაემორჩილება პარტიის საერთო გადაწყვეტილებას.

"რომელ გზასაც აირჩევს პარტია, დავემორჩილები მას, როგორც ეს აქამდეც მომხდარა, მიუხედავად იმისა, რომ რადიკალურად განსხვავებულ პოზიციაზე ვიდექი ბევრ საკითხთან დაკავშირებით( შესვლა-არშესვლა, შარლ მიშელის შეთანხმებაზე ხელის მოწერა-არმოწერა, ბოიკოტი და ა. შ)", — აცხადებს დეპუტატი.

გუშინ, 10 იანვარს ნაციონალურ მოძრაობაში პოლიტსაბჭოს სხდომა გაიმართა, რომლის შემდეგაც პარტიის ლიდერებმა საკადრო ცვლილებების შესახებ ინფორმაცია გაასაჯაროეს. კონკრეტულად პარტიის პოლიტიკურ საბჭოს კობა ნაყოფია უხელმძღვანელებს, გენერალური მდივანი კი იქნება პეტრე ცისკარიშვილი. რაც შეეხება პარტიის თავმჯდომარეს, ნიკა მელიას, როგორც მან განაცხადა, გარკვეული პერიოდით შეითავსებს თბილისის რაიონული ორგანიზაციის თავმჯდომარეობას.