ბრიტანეთის სამეფო ოჯახის წევრი და კემბრიჯის ჰერცოგინია, ქეით მიდლტონი, 9 იანვარს 40 წლის გახდა. სამეფო ოჯახის ტრადიციისამებრ, იუბილეს აღსანიშნავად ფოტოსესია მოეწყო, სადაც ქეითმა Alexander McQueen-ის კაბები და პრინცესა დაიანასა და დედოდალი ელიზაბეთის საყურეები მოირგო.

საიუბილეო ფოტოსესიაზე ფოტოგრაფმა პაოლო როვერსიმ იმუშავა, რომელსაც ისეთ ცნობილ სახეებთან უთანამშრომლია, როგორიც ნაომი კემპბელი და კეიტ მოსია. როვერსის თქმით, ჰერცოგინიის სამი პორტრეტის გადაღება მისთვის "ჭეშმარიტი ბედნიერების მომენტი" იყო.

"ჩემთვის დიდებული გამოცდილება და დაუვიწყარი მომენტი იყო. შესანიშნავ ადამიანს შევხვდი; ადამიანს, რომელსაც თავისი დადებითი ენერგიით შეუძლია სამყაროს იმედი აჩუქოს", — ამბობს ფოტოგრაფი ქეითზე.

ფოტო: Paolo Roversi / PA

სამიდან ფერადი ერთადერთი ფოტოა, სადაც ქეითს წითელი კაბა აცვია და დედოფალი ელიზაბეთის საყურეები უკეთია. დანარჩენი ორი სურათი შავ-თეთრია და მე-19 საუკუნის ესთეტიკას ატარებს. ორივე მათგანში კემბრიჯის ჰერცოგინიას პრინცესა დაიანას კუთვნილი საყურეები უკეთია.

ფოტო: Paolo Roversi / PA

ფოტო: Paolo Roversi / PA

როგორც ცნობილია, ჰერცოგინია თავის დაბადების დღეს ოჯახთან ერთად ნორფოლკში აღნიშნავს.

ქეით მიდლტონმა და კემბრიჯის ჰერცოგმა, უილიამმა, 2011 წელს იქორწინეს. სამეფო წყვილს სამი შვილი ჰყავს. მომავალ დედოფლად მიჩნეული ქეითი ბრიტანეთში გამორჩეული რეპუტაციით სარგებლობს, დიდწილად საქველმოქმედო საქმიანობაში თავისი ჩართულობის გამო.