Forbes-ის ინფორმაციით, ყაზახეთში მომუშავე ქართველმა მილიარდერმა, მიხეილ ლომთაძემ ბოლო ერთ დღეში $1,8 მილიარდი დაკარგა. მისი ქონება, 33,7%-ით, 3,4 მილიარდ დოლარამდე შემცირდა, რისი მთავარი მიზეზიც ყაზახეთში მიმდინარე მოვლენებია.

ლომთაძე Forbes-ის უმდიდრესი ადამიანების სიაში 948-ე ადგილს იკავებს, ხოლო Bloomberg-ის მილიარდერთა (500) სიაში აღარ იძებნება.

ქართველი მილიარდერი ყაზახური კომპანია Kaspi-ის თანადამფუძნებელია, რომლის აქციებიც გასულ წელს ლონდონის საფონდო ბირჟაზე განთავსდა. Kaspi ყაზახეთში არსებული უმსხვილესი საგადასახადო ფინტექ (ფინანსური ტექნოლოგიების) კომპანიაა, რომელსაც ყოველთვიურად 7 მილიონზე მეტი მომხმარებელი ჰყავს.

2020 წლის ოქტომბერში Kaspi-ს აქციების ლონდონის საფონდო ბირჟაზე განთავსების შემდეგ კომპანიის საბაზრო კაპიტალიზაციამ 6,5 მილიარდ დოლარს მიაღწია. Forbes-ის ინფორმაციით, 2019 წელს ლომთაძის მიერ დაფუძნებულმა კომპანიამ 1,3 მილიარდი დოლარის შემოსავალი მიიღო, საიდანაც 515 მილიონი წმინდა მოგება იყო.

ყაზახეთში დაძაბულობაა. საწვავის ფასის ზრდის გამო დაწყებული მასობრივი აქციების შემდეგ, ყაზახეთის მთავრობა გადადგა, თუმცა არ შეწყვეტილა დაპირისპირება. ბოლო ინფორმაციით, ათობით დემონსტრანტი და 13 სამართალდამცავია დაღუპული.