სახელმწიფო ინსპექტორი ლონდა თოლორაია აცხადებს, რომ ამერიკის შეერთებული შტატების საელჩოს განცხადება სახელმწიფო ინსპექტორის სამსახურის გაუქმებასთან დაკავშირებით არის მკაფიო მესიჯი იმის შესახებ, რომ აშშ საქართველოს დემოკრატიული ინსტიტუტების შენებაში ეხმარება და არა ნგრევაში. თოლორაის თქმით, პრეზიდენტის ვეტოს იმედი აქვს.

"ხაზგასმულია ის ძირითადი ყურადსაღები გარემოებები, რასაც ასევე მეც ვამბობდი და ძალიან მნიშვნელოვანია რომ ამერიკის ელჩმა და საელჩომ ასე ხმამაღლა დააფიქსირა თავისი პოზიცია. ეს არის ძალიან მკაფიო მესიჯი, რომ მე შენ გეხმარები დემოკრატიული ინსტიტუტების შენებაში და არა ნგრევაში. მე ძალიან დიდი იმედი მაქვს პრეზიდენტის ვეტოსი, მინდა მჯეროდეს, რომ ბოლო წერტილი, რაღაც არსებობს და კიდევ ერთხელ დაფიქრების შანსი ამ ადამიანებს აქვთ. ჯერ კიდევ არის დრო იმისი, რომ ეს გადაწყვეტილება ბოლომდე მიყვანილი არ იქნეს", — ამბობს ის TV პირველთან.

3 იანვარს აშშ-ის საელჩომ საქართველოს ხელისუფლება ინსპექტორის სამსახურისა და საერთო სასამართლოების შესახებ კანონპროექტებში შეტანილი ცვლილებების გამო გააკრიტიკა. საელჩოს განცხადებით, გასულ კვირას ინსპექტორის სამსახურის გაუქმებით ქართულმა ოცნებამ მთავრობის ანგარიშვალდებულებას ძირი გამოუთხარა, ხოლო სასამართლოებზე მიღებული კანონპროექტით კიდევ უფრო შეასუსტა ნდობა სასამართლოს მიმართ.

პარლამენტმა სახელმწიფო ინსპექტორის სამსახურის გაუქმებისა და სასამართლოების შესახებ კანონპროექტები მესამე მოსმენით დაჩქარებული წესით 30 დეკემბერს დაამტკიცა.