2022 წლის 1-ლი იანვრიდან არაერთი ხელოვანის ნამუშევარი საზოგადოებრივი საკუთრება ხდება. ახალი წლიდან გრეტა გარბოს ფილმის, უილიამ ფოლკნერის, აგათა კრისტისა და ა. ა. მილნის რამდენიმე წიგნის გამოყენება და გავრცელება თავისუფლად იქნება შესაძლებელი.

საზოგადოებრივი საკუთრება გახდება ვინი პუჰიც — საბავშვო ლიტერატურის კლასიკად ქცეული წიგნი, რომელიც ასი აკრის ტყეში მცხოვრები დათვისა და მისი მეგობრების შესახებ მოგვითხრობს. წიგნი 1926 წელს გამოიცა და რადგან გამოცემიდან 95 წელი გავიდა, მისი გავრცელება ამიერიდან თავისუფლად იქნება შესაძლებელი.

ნაწარმოებებს შორისაა ფელიქს ზალტენის ბემბი: ცხოვრება ტყეში, ასევე ერნესტ ჰემინგუეის აღმოხდების მზე, აგათა კრისტის როჯერ ეკროიდის მკვლელობა და ლენგსტონ ჰიუზისა და დოროთი პარკერის პოეტური კრებულები.

რაც შეეხება ფილმებს, საზოგადოებრივ საკუთრებად იქცევა The Temptress გრეტა გარბოს მონაწილეობით და Battling Butler ბასტერ კიტონით მთავარ როლში.

სიაში მოექცა ბევრი სიმღერაც. 1923 წლამდე გაკეთებული მუსიკალური ჩანაწერები, ჯამში 400 ათასზე მეტი, ასევე საზოგადოებრივი საკუთრება ხდება.

იმის მიუხედავად, რომ საკულტო ნაწარმოებების პირველწყაროები საზოგადოებრივ საკუთრებად იქცა, საავტორო უფლებები ჯერ ისევ ვრცელდება ვინი პუჰისა და ბემბის ეკრანიზაციებზე. ასევე მილნის სხვა წიგნებზე, რომლებიც მოგვიანებით გამოიცა.

საინტერესოა ისიც, რომ საზოგადოებრივ საკუთრებად გამოცხადება არაერთხელ გამხდარა დავის საფუძველი. მაგალითად, 2013 წელს ართურ კონან დოილის მემკვიდრეობის წარმომადგენლებმა განაცხადეს, რომ შერლოკ ჰოლმსის საზოგადოებრივ საკუთრებად ქცევა არ შეიძლებოდა, რადგან ჰოლმსი, როგორც პერსონაჟი, ჯერ ისევ დაუმთავრებელი ქმნილება იყო და ისტორიისგან დამოუკიდებლად არსებობდა.

თუმცა, კონან დოილის წარმომადგენლების მოთხოვნა არ დაკმაყოფილდა, შესაბამისად, თუკი შერლოკ ჰოლმსისა და ვინი პუჰის გაერთიანებას მოისურვებთ ბემბის დედის მკვლელობის გამოსაძიებლად, 1-ლი იანვრიდან ამას უკვე თავისუფლად შეძლებთ.