"ვწუხვარ ეგვიპტეში მომხდარი ტერორისტული აქტის გამო, ამერიკის შეერთებული შტატები მტკიცედ გმობს მომხდარს. მე მჯერა, რომ პრეზიდენტი ალ-სისი სიტუაციას სწორად გააკონტროლებს", - ასე გამოეხმაურა აშშ-ის პრეზიდენტი დონალდ ტრამპი, დღეს, ბზობის დღესასწაულზე, ეგვიპტის ორ კოპტურ ტაძარში მომხდარ აფეთქებებს, რომლის შედეგად 37 ადამიანი დაიღუპა.

ეგვიპტეში კოპტურ ტაძრებში მომხდარ აფეთქებებზე პასუხისმგებლობა ტერორისტულმა დაჯგუფებამ ისლამურმა სახელმწიფომ აიღო.

ეგვიპტელი ქრისტიანები თავდასხმის სამიზნედ გასული წლის დეკემბერშიც გახდნენ, როდესაც კაიროს კოპტურ ეკლესიაში მომხდარ აფეთქებას, შედეგად სულ მცირე 25 დაღუპული და 49 დაშავებული ადამიანი მოჰყვა, მათ შორის უმეტესობა ქალები და ბავშვები იყვნენ.