მთავრობის დადგენილებით, იმ სტუდენტებზე, რომლებიც სახელმწიფო გრანტით უცხოეთში წავიდნენ და ხელშეკრულებით გათვალისწინებული პირობა არ შეასრულა — ქვეყანაში არ დაბრუნდა, სამართლებრივი ღონისძიებები განხორციელდება. საქმე ეხება განათლების საერთაშორისო ცენტრის დაფინანსებულ საგანმანათლებლო პროგრამებს. დადგენილებას გამოქვეყნებისთანავე, ანუ 27 დეკემბრიდან ამოქმედდა.

განათლების საერთაშორისო ცენტრის პროგრამის შესახებ დადგენილების მიხედვით, სტუდენტი ვალდებულია უცხოეთში სწავლის დასრულებიდან 1 თვის ვადაში დაბრუნდეს ქვეყანაში მინიმუმ სამი წლით და დასაქმდეს შესაბამის სფეროში. ცვლილების მიხედვით, მათ, ვინც ეს პირობა არ შეასრულა, გააფრთხილებენ და ქვეყანაში დაბრუნების ვადად 2022 წლის 31 მარტი განესაზღვრებათ. ამ ვადის გასვლის შემდეგ ცენტრს შესაძლებლობა ექნება კონკრეტული სტუდენტის მიმართ სამართლებრივი ღონისძიებები განახორციელოს. დადგენილებაში არაა დაკონკრეტებული, რა სახის ღონისძიებებზეა საუბარი.

აქვეა აღნიშნული, რომ თუ სტუდენტს, რომელმაც სწავლის დასრულებიდან საქართველოში დაბრუნების ერთთვიან ვადას 20 სამუშაო დღით გადააცილა, შეუძლია წარადგინოს შესაბამისი განცხადება და მოითხოვოს დარღვეული დღეების საპატიოდ ჩათვლა. განცხადებას პროგრამის კომისია განიხილავს.

კიდევ ერთი ცვლილება, რომელიც დადგენილებაში შედის, ისაა, რომ ცენტრს დაევალა ირაკლი ღარიბაშვილის ინიციატივით შექმნილ სამუშაო ჯგუფთან თანამშრომლობა, რათა ხელი შეუწყოს მისი დაფინანსებული სტუდენტების დასაქმებას.