საქართველოში ამერიკის შეერთებული შტატების ელჩი, კელი დეგნანი საერთო სასამართლოების კანონში ცვლილებასთან დაკავშირებით შეშფოთებას გამოთქვამს. მისი თქმით, კანონმდებლობის მიღება ნაჩქარევია. ელჩი ინკლუზიურ პროცესსა და დაინტერესებულ მხარეებთან კონსულტაციების მნიშვნელობაზე ამახვილებს ყურადღებას. ამის შესახებ კელი დეგნანმა პარლამენტში, იურიდიულ საკითხთა და ადამიანის უფლებათა კომიტეტების თავმჯდომარეებთან, ანრი ოხანაშვილთან და მიხეილ სარჯველაძესთან შეხვედრის შემდეგ ისაუბრა.

"გვქონდა შესაძლებლობა, გვესაუბრა იმ ცვლილებებზე, რომლებიც შედის საერთო სასამართლოების შესახებ კანონმდებლობაში. ეს შეეხება დისციპლინარულ პროცედურებს მოსამართლეებთან დაკავშირებით. ეს პროცესი მიმდინარეობს ნაჩქარევად, შესაბამისად, ჩვენ გამოვთქვით შეშფოთება ამასთან დაკავშირებით. ეს პროცესი უნდა იყოს უფრო ფართო და ინკლუზიური, სადაც ჩართული იქნება სხვადასხვა ექსპერტი და დაინტერესებული მხარე. შესაბამისად, გადაწყდება უფრო მეტი კონსულტაციის და ფიქრის შედეგად, თუ რა შედის საქართველოს საუკეთესო ინტერესებში", — თქვა დეგანმა.

დეპუტატებმა გურამ მაჭარაშვილმა, გივი მიქანაძემ, რატი იონათამიშვილმა, გიორგი ამილახვარმა, ანრი ოხანაშვილმა და ალექსანდრე ტაბატაძემ დააინიცირეს კანონპროექტი, რომელიც საერთო სასამართლოების შესახებ საქართველოს ორგანულ კანონში ცვლილების შეტანას ითვალისწინებს. კანონპროექტი დაჩქარებული წესით განიხილება.

კანონპროექტის განმარტებით ბარათში ვკითხულობთ, რომ მოსამართლეებს აეკრძალებათ აზრის გამოთქმა "გაწონასწორებულობის და ზომიერების კრიტერიუმის, ან — პოლიტიკური ნეიტრალიტეტის პრინციპის დარღვევით". ამასთან, კანონში სხვა ცვლილებებიცაა დაგეგმილი.