შიდა ქართლში სახალხო დამცველის წარმომადგენლის, ანა ჯანიაშვილის ინფორმაციით, გორის სამხედრო ჰოსპიტალში მიხეილ სააკაშვილმა გონება დაკარგა. მან ექსპრეზიდენტი პირადად მოინახულა და განაცხადა, რომ სააკაშვილის თქმით, აპირებდნენ მის გადაყვანას ჰისპიტალიდან.

"მე დღეს მოვინახულე ბატონი მიხეილი. მან მომაწოდა ინფორმაცია, რომ საღამოს საათებში მასთან შევიდნენ და აცნობეს, რომ ხდებოდა მისი ჰოსპიტალიდან გაყვანა, რის გამოც მან გაუწია წინააღმდეგობა. შემდეგ უკვე აღარ ახსოვს რაღაც ეტაპი და როდესაც მოვიდა გონებაზე, განაცხადა, რომ აღარ მოხდებოდა მისი ჰოსპიტლიდან გაყვანა [...] ამ ემოციური ფონის შემდეგ ჰოსპიტალმა მიიღო გადაწყვეტილება, რომ მისი გადაყვანა შეჩერდა, სანამ არ დასტაბილურდება სიტუაცია", — განაცხადა ჯანიაშვილმა.

მისი თქმით, სააკაშვილმა მოსთხოვა პერსონალს ეთქვათ სად გადაჰყავდათ, თუმცა პასუხი ვერ მიიღო. სახალხო დამცველის წარმომადგენლის ინფორმაციით, ექსპრეზიდენტს ფიზიკური დაზიანებები არ აღენიშნება.

ჯანიაშვილის თქმით, სახალხო დამცველი შემთხვევას დეტალურად შეისწავლის და ინფორმაციას გაასაჯაროებს.

"სახალხო დამცველი შეისწავლის კიდევ დეტალებში, ამ გადაწყვეტილების მიღების დროს და წინააღმდეგობის გაწევის დროს ხომ არ იყო მისი უფლებები შელახული და შემდეგ უკვე გეცნობებათ", — ამბობს ჯანიაშვილი.

კითხვას, პროტესტის მიზნით სააკაშვილი ხომ არ აპირებს ისევ შიმშილობის დაწყებას, ჯანიაშვილმა ასე უპასუხა:

"არ არის გამორიცხული".

27 დეკემბერს, მთელის საღამოს განმავლობაში ვრცელდებოდა ინფორმაცია გორის სამხედრო ჰოსპიტალიდან მიხეილ სააკაშვილის შესაძლო გადაყვანის შესახებ. ეს ინფორმაცია კიდევ უფრო გაამყარა იმან, რომ ექიმები, ნიკოლოზ ყიფშიძე და ოთარ თოიძე მის სანახავად არ შეუშვეს.

გაიგე მეტი: