ეკონომიკის მინისტრი ნათია თურნავა ჯანდაცვის ახალ მინისტრად ზურაბ აზარაშვილის დანიშვნას მიესალმება და მისი აზრით, სამინისტროს თანხების უკეთ განკარგვას ახალი მინისტრი, თავისი გამოცდილებიდან გამომდინარე, უკეთ გაუმკლავდება, ვიდრე რომელიმე სხვა სპეციალობისა და პროფესიის ადამიანი.

"მინდა ვისარგებლო შემთხვევით და მივულოცო ჩვენს ახალ კოლეგას. საკმაოდ მაღალი რანგის პრფესიონალი შემოურთედა ჩვენს გუნდს. ჩემი კოლეგა ეკონომისტი, ფინანსისტი. საერთოდ მივესალმები რაც უფრო მეტი ეკონომისტი და ფინანსისტი იქნება წამყვან თანამდებობაზე, ეს მართლაც წარმატების საწინდარია", — აღნიშნა თურნავამ.

მისივე თქმით, ჯანდაცვის სექტორი არის ერთ-ერთი მსხვილი ბიუჯეტის მქონე სამინისტრო და სექტორი მთლიანობაში. უწყების ბიუჯეტი 6 მილიარდ ლარზე მეტია.

"განსაკუთრებით კოვიდის პერიოდში მისი რესურსტევადობა გაიზარდა. კოვიდი, ჯერჯერობით, არსად წასულა და ეს გამოწვევა წინ არის. აქედან გამომდინარე, დღის წესრიგში დგება ამ თანხების მეტად ეფექტიანი განკარგვა. ეს ერთი ამოცანაა, რასაც, რასაკვირველია, ახალი მინისტრი თავისი გამოცდილებიდან გამომდინარე უკეთ გაუმკლავდება ჩემი აზრით, ვიდრე რომელიმე სხვა სპეციალობისა და პროფესიის ადამიანი, — განაცხადა თურნავამ.

გარდა ამისა, თურნავამ აღნიშნა, რომ ქვეყანას ფასების გამოწვევა აქვს და ადეკვატური ხარისხისა და ადეკვატური ხელმისაწვდომი ფასების მქონე ჯანდაცვის სერვისების მოსახლეობისთვის მიწოდება დიდად არის დამოკიდებული ჯანდცვის სექტრის რეფორმის შემდგომ ეტაპზე. თურნავა ფიქრობს, რომ ახალი მინისტრისა და მისი ეკონომიკური გამოცდილების როლი ამ საკითხში დიდი იქნება.

დღეს, 27 დეკემბერს მთავრობის სხდომის დაწყებამდე, ირაკლი ღარიბაშვილმა განაცხადა, რომ ჯანდაცვის ახალ მინისტრად ზურაბ აზარაშვილს ნიშნავს. წარდგენისას ღარიბაშვილმა აღნიშნა, რომ აზარაშვილი "არის გაზრდილი ექიმის ოჯახში".

ზურაბ აზარაშვილი ჯანდაცვის მინისტრობამდე თავდაცვის მინისტრის მოადგილის პოსტს იკავებდა, იქამდე კი იყო ამავე უწყების სამხედრო სამეცნიერო-ტექნიკური ცენტრ დელტას გენერალური დირექტორი. სამინისტროს საიტზე განთავსებულ აზარაშვილის ბიოგრაფიის მიხედვით, მას ჯანდაცვის სფეროში მუშაობის გამოცდილება არ აქვს.