ქართული ოცნების თავმჯდომარემ, ირაკლი კობახიძე პრეზიდენტ სალომე ზურაბიშვილს შეხვდა. შეხვედრის შემდეგ მან განაცხადა, მზად არიან პოლარიზაციის შემცირებისკენ მიმართულ პროცესში წვლილი შეიტანონ.

კობახიძე ამბობს, რომ საერთო ეროვნული თანხმობის მიღწევა "საკმაოდ ამბიციური მიზანია". მისივე თქმით, ისინი ამ პროცესის ინიციატორები არ არიან, შესაბამისად, მისი დაგეგმვა თავიდან ბოლომდე ზურაბიშვილის "პრეროგატივაა".

"პრეზიდენტთან გვქონდა შეხვედრა, ეროვნული თანხმობის პროცესთან დაკავშირებით, მოვისმინეთ მისი ხედვა იმასთან დაკავშირებით, თუ მას თავად როგორ წარმოუდგენია ეს პროცესი. კიდევ ერთხელ დავაფიქსირეთ ჩვენი პოზიცია ქალბატონ სალომესთან, რომ მზად ვართ, მაქსიმალური წვლილი შევიტანოთ ყველა იმ წამოწყებაში, რომლის მიზანიც იქნება ქვეყანაში პოლარიზაციის ხარისხის შემცირება. მან დააზუსტა, რომ აქ არ იგულისხმება რასაც ჰქვია შერიგება, პოლიტიკურ პარტიებს შორის, ეს არ არის როგორც ასეთი, მიზანი ეროვნული თანხმობის. მიზანი არის საერთო ეროვნული თანხმობის მიღწევა, რაც არის საკმაოდ ამბიციური მიზანი", — განაცხადა მან.

კობახიძესთან ერთად, შეხვედრაზე მმართველი პარტიის აღმასრულებელი მდივანი, მამუკა მდინარაძეც იმყოფებოდა.

16 დეკემბერს, პრეზიდენტმა, სალომე ზურაბიშვილმა სპეციალურ საახალწლო მიღებაზე, რომელზეც როგორც ხელისუფლება, ისე საპარლამენტო და არასაპარლამენტო ოპოზიციის წარმომადგენლები მიიწვია, ქვეყანაში არსებულ პოლარიზაციაზე ისაუბრა და მისი გადაჭრის გზად სწორედ ერთიანი ძალისხმევა დაასახელა. ზურაბიშვილის განცხადებით, შერიგება ვერ იქნება წინაპირობა, რადგან ის არის შედეგი. მისივე თქმით, პროცესი უნდა დაიწყოს მოსმენით, აზრების გაცვლით, გაგრძელდეს სიმართლის გაგებითა და შემდეგ შეიძლება, საბოლოო მიზანს მიაღწიო.

საახალწლო მიღების შემდეგ პრეზიდენტი ეროვნულ თანხმობაზე სასაუბროდ ინდივიდუალურ შეხვედრებს მართავს პოლიტიკოსებთან, რელიგიური კონფესიების წარმომადგენლებთან, არასამთავრობო ორგანიზაციის წარმომადგენლებთან, სახალხო დამცველთან და სახელმწიფო ინსპექტორთან.

გაიგე მეტი: