დაავადებათა კონტროლის ეროვნული ცენტრის ხელმძღვანელის, ამირან გამყრელიძის განცხადებით, ომიკრონის კიდევ 5 შემთხვევა დადასტურდა, ანუ ქვეყანაში დღეისთვის ამ შტამით 29 ინფიცირებული გვყავს. მისი თქმით, ეს მხოლოდ ლაბორატორიულად დადასტურებული შემთხვევებია და რეალურად შესაძლოა უფრო მეტი ადამიანი იყოს დაინფიცირებული. გამყრელიძე ამბობს, რომ ომიკრონმა გავრცელება დაიწყო.

"ამ ეტაპისთვის დაემატა კიდევ [ომიკრონის] 5 შემთხვევა, რომელიც დადასტურდა ჩვენთან, დაავადებათა კონტროლის ცენტრის ლუგარის ლაბორატორიაში, ანუ სულ დადასტურებულია დღეისთვის 29 ლაბორატორიულად. მაგრამ, ალბათ გაცილებით მეტია, რადგან იმ პროტოკოლის მიხედვით, რომელიც აქვთ ყველა ლაბორატორიაში, ჩვენ მიერ 30 ნოემბერს დაგზავნილი, სად შეიძლება მიიტანონ ეჭვი, ეს ეჭვები უფრო და უფრო გახშირდა ბოლო დღეების განმავლობაში.

მხედველობაში მაქვს ლაბორატორიული ინდიკატორები, სადაც შეიძლება, დაშვებული იყოს, რომ არის ომიკრონი და ხდება მისი გადამოწმება შემდეგ ლუგარის ცენტრში, დაახლოებით 50%-ში ამ შემთხვევებისა დასტურდება, რომ გახლავთ ომიკრონის შტამი. ანუ, ფაქტობრივად, დაიწყო მან უკვე ცირკულაცია ქვეყანაში და როგორც ვპროგნოზირებდით ჩვენთანაც ვრცელდება", — განაცხადა მან პირველი არხის ეთერში.

მისივე განცხადებით, ომიკრონის დადასტურებული შემთხვევები მსუბუქად მიმდინარეობს და მხოლოდ ერთ ინფიცირებულს დასჭირდა სტაციონარული მკურნალობა. ამასთანავე, გამყრელიძის თქმით, ინფიცირებულების უმრავლესობა ვაქცინირებულია.

20 დეკემბერს საქართელოში ომიკრონის პირველი 2 შემთხვევა დაფიქსირდა.

კორონავირუსის ახალი ვარიანტი, ომიკრონი სამხრეთ აფრიკაში 25 ნოემბერს დაფიქსირდა. ჯანდაცვის მსოფლიო ორგანიზაციამ ახალი შტამი შეშფოთების საგნად გამოაცხადა. ომიკრონის გამო ევროკავშირის ქვეყნებმა და ამერიკის შეერთებულმა შტატებმა სამხრეთ აფრიკის ქვეყნებიდან ფრენები აკრძალეს. რეგულაციები დაწესდა საქართველოშიც. უწყებათაშორისი საკოორდინაციო საბჭოს გადაწყვეტილებით, 28 ნოემბრიდან 8 ქვეყნიდან შემოსულ მგზავრებს 14-დღიანი კარანტინის გავლა მოუწევთ.