საქართველოს პრეზიდენტი, გიორგი მარგველაშვილი დღეს პარლამენტის წინაშე ყოველწლიური სიტყვით გამოვიდა, გამოსვლას ესწრებოდნენ მთავრობის წევრებიც. მათი განცხადებები პრეზიდენტის საპარლამენტო გამოსვლაზე თითქმის ერთნაირი შინაარსის იყო და ის შეიცავდა შემდეგი სახის შეფასებებს: "ნაკლებად შინაარსიანი", "ზედაპირული", "აკლდა სიღრმე", "აკლდა კონკრეტიკა".

On.ge გთავაზობთ მთავრობის წევრთა შეფასებებს:

გიორგი კვირიკაშვილი, საქართველოს პრემიერმინისტრი: "შემიძლია, გითხრათ, რომ მთელი რიგი მიმართულებები, როგორიც არის სასამართლო, ეკონომიკური განვითარება დემოკრატიის და დემოკრატიული ინსტიტუტების განვითარება ქვეყანაში არა მხოლოდ ჩვენი აზრით, არამედ ყველა ჩვენი მეგობრის, საერთაშორისოს აქტორების აზრით, საქართველოში არის შესამჩნევი პროგრესი. ვისურვებდი, პრეზიდენტის გამოსვლა უფრო სიღრმისეული და ობიექტური ყოფილიყო."

კახი კალაძე, ენერგეტიკის მინისტრი: "ვფიქრობდი, რადგან პარლამენტში მიბრძანდებოდა პრეზიდენტი, სადაც პრემიერმინისტრი, მთავრობა, დიპლომატიური კორპუსი, ყველა იყო მობრძანებული, ვფიქრობდი, რომ უფრო მომზადებული იქნებოდა, უფრო ჩაუღრმავდებოდა თემებს, უფრო ობიექტური იქნებოდა, მაგრამ ჩვენ მოვისმინეთ განსხვავებული გამოსვლა პრეზიდენტის."

ალექსანდრე ჯეჯელავა, განათლების მინისტრი: "ცოტა უფრო მეტ კონკტეტიკასა და მეტ დეტალიზაციას მოველოდით, რაღაც საკითხებში. იმის თქმა პირველი პირისგან რომ სასამართლოში არის კრიზისი, სრულიად გაუმართლებელია. ასევე ეკონომიკური პროგრესის და თითოეული ოჯახისთვის ამ პროგრესის მინიმიზაცია და არ აღნიშვნა, ჩემი აზრით, არ არის პროგრესული."

სოზარ სუბარი, ლტოლვილთა და განსახლების მინისტრი: "პირველ რიგში ვიტყოდი, რომ პრეზიდენტის მოხსენება არ იყო ღრმა. პრეზიდენტი დღეს მოგეხსენებათ რომ არ არის აღმასრულებელი და არც საკანონმდებლო, იგი ერთგვარი არბიტრის როლს უნდა თამაშობდეს. შესაბამისად მისი მოხსენებაც უნდა ყოფილიყო ზოგადი მიმოხილვაც ქვეყანაში არსებული მდგომარეობის."

გიორგი გახარია, ეკონომიკისა და მდგრადი განვითარების მინისტრი: "გულწრფელად მქონდა მოლოდინი უფრო ობიექტური და რაც მთავარია შინაარსობრივი ტექსტის. იყო ბევრ თემაზე საუბარი, მაგრამ კიდევ ერთხელ, ველოდი რომ ტექსტი იქნებოდა უფრო შინაარსობრივი. მიუხედავად იმისა, რომ პრეზიდენტმა აღნიშნა, ის პოზიტიური ტენდენციები, რომელიც დღეს ჩვენ ეკონომიკაში გვაქვს, საერთო ჯამში ველოდით, რომ ტექსტი იქნებოდა უფრო შინაარსობრივი."