დროას ლიდერის, ელენე ხოშტარიას განცხადებით, პრეზიდენტ სალომე ზურაბიშვილთან შეხვედრის შემდეგ დარწმუნდა, რომ ის საკუთარ შეთავაზებაში გულწრფელია და პოლარიზაციის დაძლევის გზებს ნამდვილად ეძებს. მისივე თქმით, ზურაბიშვილი პროცესს ძალიან სწორად უყურებს.

"ჩემი დამოკიდებულება ამ პროცესის მიმართ კიდევ უფრო გაღრმავდა და განმტკიცდა, იმიტომ, რომ ის, რაზეც შეიძლებოდა მევარაუდა, რომ პრეზიდენტი გულწრფელია ამ შეთავაზებაში, მე ამ შეხვედრის დროს კიდევ უფრო ღრმად დავრწმუნდი, რომ პრეზიდენტი მართლაც ეძებს პოლარიზაციის დაძლევის გზებს", — განაცხადა მან.

ხოშტარია დასძენს, რომ მართლმსაჯულების სისტემაზე გამართვის გარეშე ეროვნულ თანხმობაზე საუბარი შეუძლებელია. მისი თქმით, საჭიროა ინსტიტუციური გარანტიები, მათ შორის, იმის გარანტია, რომ ქვეყანაში სამართლიანი გარემო იქნება და "შურისძიება იქნება დაუშვებელი".

პრეზიდენტმა პოლიტიკურ პარტიებთან შეხვედრები დაიწყო. გუშინ, 22 დეკემბერს ის ოპოზიციის რამდენიმე წარმომადგენელს შეხვდა. ზურაბიშვილმა შეხვედრა სალომე სამადაშვილთან, ხატია დეკანოიძესთან, მამუკა ხაზარაძესთან, ბადრი ჯაფარიძესთან, ალეკო ელისაშვილთან, ლევან იოსელიანთან, ანა დოლიძესთან, იაგო ხვიჩიასთან და ვახტანგ მეგრელიშვილთან გამართა.

16 დეკემბერს, პრეზიდენტმა, სალომე ზურაბიშვილმა სპეციალურ საახალწლო მიღებაზე, რომელზეც როგორც ხელისუფლება, ისე საპარლამენტო და არასაპარლამენტო ოპოზიციის წარმომადგენლები მიიწვია, ქვეყანაში არსებულ პოლარიზაციაზე ისაუბრა და მისი გადაჭრის გზად სწორედ ერთიანი ძალისხმევა დაასახელა. ზურაბიშვილის განცხადებით, შერიგება ვერ იქნება წინაპირობა, რადგან ის არის შედეგი. მისივე თქმით, პროცესი უნდა დაიწყოს მოსმენით, აზრების გაცვლით, გაგრძელდეს სიმართლის გაგებითა და შემდეგ შეიძლება, საბოლოო მიზანს მიაღწიო.

მანამდე, 10 დეკემბერს, აშშ-ში, დემოკრატიის სამიტზე სიტყვით გამოსვლისას სალომე ზურაბიშვილმა განაცხადა, რომ დაიწყებს ინკლუზიურ პროცესს და ეროვნული მასშტაბის საუბარს, რომელშიც მთელი საზოგადოება იქნება ჩართული. ზურაბიშვილის თქმით, ამით მივაღწევთ უახლესი ისტორიის "საერთო აღქმას" და წავალთ წინ.

მოქმედ პრეზიდენტის გამოეხმაურა ყოფილი პრეზიდენტი, მიხეილ სააკაშვილი და მას ასევე ყოფილი პრეზიდენტის, გიორგი მარგველაშვილის იდეის შესრულება შესთავაზა. საუბარია სამივე პრეზიდენტის შეხვედრაზე. სააკაშვილმა ზურაბიშვილი და მარგველაშვილი გორის სამხედრო ჰოსპიტალში შესახვედრად მიიწვია.

იდეას გამოეხმაურა მარგველაშვილიც, რომელმაც განაცხადა, რომ სამი პრეზიდენტის შეხვედრა სწორად დანახული დინამიკაა.

France 24-თან ინტერვიუში კი ზურაბიშვილმა განაცხადა, რომ აიღო ვალდებულება, შერიგების პროცესის დაწყების.