სახელმწიფო უსაფრთხოების სამსახურით ინფორმაციით, ქრთამის აღების ბრალდებით კაჭრეთის სერვისცენტის უფროსი დააკავეს. გამოძიების მიხედვით, ბრალდებული პირადი მიზნებისთვის სახელმწიფოს კუთვნილი სასოფლო-სამეურნეო ტექნიკას სისტემატურად იყენებდა, ასევე, უკანონოდ მიითვისა სახელმწიფო ქონება.

"აღნიშნულმა პირმა შესაბამისი ხელშეკრულების გაფორმებისა და ბრძანებით ოფიციალურად განსაზღვრული თანხის კომპანიის საბანკო ანგარიშზე ჩარიცხვის გვერდის ავლით, შპს სოფლის მეურნეობის ლოჯისტიკის და სერვისების კომპანიის კუთვნილი ტექნიკით 15 ჰექტარი მიწის ნაკვეთის მოხვნის სანაცვლოდ, მოქალაქეს ქრთამის სახით 8 465 ლარი გამოართვა და მართლსაწინააღმდეგოდ მიისაკუთრა", — წერია განცხადებაში.

უწყების ცნობით, საცხოვრებელი მისამართების ჩხრეკის შედეგად, 11 500 დოლარი და 52 245 ლარი ამოიღეს. გამოძიება ქრთამის აღების ბრალდებით მიმდინარეობს, რაც სასჯელის სახით თავისუფლების 6-დან 9 წლამდე ვადით აღკვეთად ითვალისწინებს.