დაავადებათა კონტროლისა და საზოგადოებრივი ჯანმრთელობის ეროვნული ცენტრის დირექტორი, ამირან გამყრელიძე აცხადებს, რომ ამზადებენ რეკომენდაციების ახალ პაკეტს, რომელსაც საკოორდინაციო საბჭოს წევრებს უახლოეს მომავალში წარუდგენენ. გამყრელიძე განმარტავს, რომ რეკომენდაციების უმრავლესობა შეეხება უკვე არსებული შეზღუდვების გამკაცრების მექანიზმებს და არა ახალი შეზღუდვების დამატებას.

"ამ ეტაპზე უმთავრესი გახლავთ აღსრულება იმისი, რაც დაწესებულია. მოდუნდა უკვე, რასაც მე ინფორმაციას მაძლევენ. ანუ, საკვებ ობიექტებში ადამიანები შედიან, ყველა აღარ ითხოვს ამ მწვანე პასპორტს. ზოგიერთი, რა თქმა უნდა, ითხოვს და მეც გამოვცადე, 1-2-ჯერ სპეციალურად შევედი და მშვენივრად მომთხოვეს რამდენიმე ორგანიზაციაში და კარგია, მაგრამ ზოგან არ ითხოვენ უკვე, ანუ მოდუნდა ყურადღება. ამიტომ, სულ უფრო და უფრო მეტი შემოძახილი გვჭირდება და გამკაცრება მწვანე პასპორტის, როგორც არის დღეს მიღებული, მისი აღსრულების. ეს აუცილებელია", — განაცხადა გამყრელიძემ.

რაც შეეხება მწვანე პასპორტების უვადოობის საკითხს, გამყრელიძე ამბობს, რომ მომავალში შესაძლოა ეს საკითხი გადაიხედოს.

"მუდმივი ამ ქვეყანაზე არაფერი არ არის. ალბათ, ზოგიერთი საკითხი გარკვეული პერიოდულობით გადაიხედება. ამ ეტაპზე, მოდით რა, ის მაინც აღვასრულოთ, რაც დაწესებულია", — განაცხადა ამირან გამყრელიძემ.

დღეს მან ასევე განაცხადა, რომ ქვეყანაში უკვე კორონავირუსის ახალი შტამის, ომიკრონის 2 ახალი შემთხვევა დადასტურდა. გამყრელიძის თქმით, ორივე მათგანი საქართველოს მოქალაქეა და მათ მოგზაურობის ისტორია აქვთ. ერთს ამერიკის შეერთებულ შტატებში, მეორეს კი დუბაიში.