საქართველოს პრეზიდენტი, გიორგი მარგველაშვილი ამბობს, რომ საკონსტიტუციო უმრავლესობის შექმნა აჩენდა ძალაუფლების კონცენტრაციის საფრთხეს, რომელიც სერიოზულ პრობლემად იქცა. ამის შესახებ მარგველაშვილმა ყოველწლიური ანგარიშის წარდგენის დროს პარლამენტში განაცხადა.

პრეზიდენტის თქმით, საკონსტიტუციო რეფორმა აჩენდა თამამი რეფორმებისა და ინიციატივების შესაძლებლობას, თუმცა, რეფორმის დინამიკა მისთვის არაა შთამბეჭდავი.

"მე არაერთხელ მითქვამს არჩევნებში გამარჯვების შემდეგ, რომ საქართველოს ყველა მოქალაქის სამსახურში ვარ და ყველა ამომრჩევლის პრეზიდენტი ვარ. ზუსტად ასევე - თქვენც, პარტიული კუთვნილების მიუხედავად, ყველას მინისტრები და დეპუტატები ხართ. მე ველოდები იმ დროს, როდესაც გამარჯვებული ძალა დაიწყებს მოკავშირეების და არა მტრების ძებნას. რადგან, მჯერა, რომ ყველაზე მაღალი ამბიცია, რაც შეიძლება პოლიტიკოსს ჰქონდეს, ეს ქვეყნისა და საზოგადოების გამთლიანებაა. ამიტომ, არა ერთხელ მოგიწოდეთ და დღესაც მოგიწოდებთ დიალოგისკენ, ინსტიტუციური თანამშრომლობისკენ,"- აღნიშნა მარგველაშვილმა და დასძინა, რომ მმართველმა პოლიტიკურმა ძალამ, ქართულმა ოცნებამ პრაქტიკულად უარი თქვა დიალოგზე და ჩაიკეტა საკუთარ თავში.

პრეზიდენტის გამოსვლა 40 წუთზე მეტია დაიწყო.