ყოველი სემესტრის დასაწყისში სტუდენტებს ახალი კურსების სილაბუსების წაკითხვა ევალებათ, თუმცა ამას უმეტესობა არ აკეთებს. კენიონ უილსონმა, რომელიც ტენესის უნივერსიტეტის პროფესორია, თავისი სტუდენტები დატესტა, რათა გაეგო, სილაბუსს კითხულობდნენ თუ არა.

პროფესორმა სილაბუსის ბოლოში ფულადი ჯილდოს ადგილსამყოფელი და კარადის კოდი დაწერა. ვინც პირველი ნახავდა ამ მინიშნებას, ის 50 დოლარს იპოვიდა. თუმცა სემესტრის ბოლოს, როცა პროფესორმა კარადა შეამოწმა, ფული ისევ ადგილზე იყო.

ფოტო: Facebook

"აკადემიურ სივრცეში ყველამ ვიცით, რომ სილაბუსს არავინ კითხულობს. ეს იმ სიტუაციის ანალოგიურია, როცა ახალ აპლიკაციას იწერ და პირობებსა და წესებს წაუკითხავად ეთანხმები", — ამბობს პროფესორი CNN-თან ინტერვიუში.

კურსს 71 სტუდენტი ესწრებოდა, თუმცა სილაბუსი არავინ წაიკითხა იმის მიუხედავად, რომ პროფესორმა ისინი გარკვეული ცვლილებების შესახებ გააფრთხილა.

უილსონმა ჯილდოს ადგილსამყოფელი ფინალურების შემდეგ შეამოწმა და როცა ფული ისევ ადგილზე დახვდა, ამ ამბის შესახებ ფეისბუქზე დაპოსტა. პოსტი მალევე გახდა პოპულარული და ამ ამბავმა სტუდენტებიც გაამხიარულა.

"ჩემს სტუდენტებს კარგად ვიცნობ და არ ველოდი, რომ ისინი სილაბუსს სიტყვა-სიტყვით წაიკითხავდნენ. მაგრამ თუ ვინმე ამას გააკეთებდა, მისი დაჯილდოება ძალიან მინდოდა", — თქვა პროფესორმა.

უილსონის პოსტს რამდენიმე პროფესორიც გამოეხმაურა და მისი იდეა ძალიან მოეწონათ. "ალბათ, 2022 წლის გაზაფხულის სემესტრში სილაბუსებს ყველა ზედმიწევნით და ბოლომდე წაიკითხავს", — იხუმრა პროფესორმა.