ნაციონალური მოძრაობის ერთ-ერთმა ლიდერმა, ხატია დეკანოიძემ მიხეილ სააკაშვილის გორის სამხედრო ჰოსპიტალში მოინახულა. შეხვედრის შემდეგ, რომელიც რამდენიმე საათს გაგრძელდა, დეკანოიძემ მედიასთან ექსპრეზიდენტის ჯანმრთელობის მდგომაროებაზე ისაუბრა. ის ამბობს, რომ სააკაშვილი ბოლოს ორი კვირის წინ ნახა და ამ პერიოდში მისი ფიზიკური მდგომაროება საგრძნობლად დამძიმდა. დეკანოიძე ამბობს, რომ ბოლო ორ კვირაში სააკაშვილმა 7 კილო დაიკლო.

"წონაში არის დაკლებული, ძალიან უჭირს გადაადგილება და ეს არის თვალშისაცემია. რა თქმა უნდა, ღამის ძირი არ აქვს მოწესრიგებული, რაც არის ნევროლოგიური ფაქტორი, ძალიან მნიშვნელოვანი. პრაქტიკულად, აქვს ძალიან სერიოზული პოსტტრამვული სინდრომი, რომელიც განვითარდა წამების და არაადამიანური მოპყრობის შემდეგ [...]

რეალურად, ძალიან მნიშვნელოვანია გვესმოდეს, რომ მისი რეაბილიტაცია ისეთ პირობებში, იმ — უკაცრავად, ცოტა უხეში გამოთქმაა, მაგრამ იმ გალიაში, რა თქმა უნდა, წარმოუდგენელია", — განაცხადა ხატია დეკანოიძემ.

მან თქვა, რომ ექსპრეზიდენტს ესაუბრა როგორც ქვეყნის შიგნით, ისე საზღვრებს გარეთ განვითარებულ პოლიტიკურ მოვლენებზე. რაც შეეხება სალომე ზურაბიშვილის ინიციატივას, დეკანოიძე ამბობს, რომ ექსპრეზიდენტი მოქმედი პრეზიდენტის გადადგმულ ნაბიჯებს აფასებს, თუმცა მას შერიგებას ვერ უწოდებს.

"საქართველოს პრეზიდენტის მიერ შემოთავაზებულ კონკრეტულად პოლიტიკური თამაშის წესების შეთანხმებას — მე ამას შერიგებას ვერ დავარქმევდი და არც თვითონ არ ფიქრობს, რომ ამ პორცესს შერიგება უნდა ვუწოდოთ — აფასებს ამ პროცესს ნამდვილად. ამბობს, რომ ძალიან მნიშვნელოვანია, განსაკუთრებით, პოლიტიკური მართლმსაჯულების ნაწილში", — განაცხადა ხატია დეკანოიძემ.

16 დეკემბერს, ორბელიანების სასახლეში პრეზიდენტმა სალომე ზურაბიშვილმა საახალწლო მიღება გამართა, სადაც მიიწვია როგორც მმართველი პარტიის, ისე საპარლამენტო და არასაპარლამენტო ოპოზიციის წარმომადგენლები. მან თქვა, რომ დაპირისპირებული პოლიტიკური მხარეების ერთ ღონისძიებაზე მიწვევით სურდა "ატმოსფეროს შეცვლა და ახალი განწყობის შემოტანა". შეხვედრაზე ზურაბიშვილმა ისაუბრა პოლარიზაციის უარყოფით შედეგებსა და ერთიანობის მნიშვნელობაზე.

ექსპრეზიდენტი მიხეილ სააკაშვილი რუსთავის პენიტენციური დაწესებულებიდან გორის სამხედრო კლინიკაში 19 ნოემბერს, 50-დღიანი შიმშილობის შემდეგ გადაიყვანეს.

გაიგე მეტი: