ევროპის ლიბერალთა და დემოკრატთა ალიანსი (ALDE) საქართველოს ხელისუფლებას ექსპრეზიდენტ მიხეილ სააკაშვილის დაუყოვნებლივ გათავისუფლებისკენ მოუწოდებს. ALDE-ს განცხადებით, ხელისუფლებას ყოფილი პრეზიდენტი პატიმრობაში საეჭვო მტკიცებულებებით ჰყავს.

"მოვუწოდებთ საქართველოს ხელისუფლებას ბატონი სააკაშვილი დაუყოვნებლივ გაათავისუფლონ და სამართლიანი მოპყრობისა და ღირსების უფლების უზრუნველსაყოფად ყოფილი პრეზიდენტის მიმართ ყურადღება გაამახვილონ", — ნათქვამია განცხადებაში.

ექსპრეზიდენტი რუსთავის პენიტენციური დაწესებულებიდან გორის სამხედრო კლინიკაში 19 ნოემბერს, 50-დღიანი შიმშილობის შემდეგ გადაიყვანეს. უკრაინაში მცხოვრები სააკაშვილი საქართველოში სექტემბრის ბოლოს, საარჩევნოდ დაბრუნდა, რომლის შემდეგაც ის პირველ ოქტომბერს დააკავეს. დაკავების პირველივე დღიდან მან შიმშილობა გამოაცხადა. შიმშილობა გაგრძელდა გლდანის მე-18 დაწესებულებაშიც, სადაც მისი განცხადებით, მოტყუებითა და იძულებით გადაიყვანეს. სააკაშვილმა შიმშილობა მას შემდეგ შეწყვიტა, რაც იუსტიციის სამინისტრომ გორის სამხედრო ჰოსპიტალში გადაყვანა შესთავაზა.