თანამედროვე ჰოლივუდში ერთ-ერთ ყველაზე ცნობილ მსახიობ კაცს, ბენ აფლეკს დიდი ხნის განმავლობაში ჰქონდა ალკოჰოლთან დამოკიდებულების პრობლემა. უახლეს ინტერვიუში მან საჯაროდ განაცხადა, რომ ამ პრობლემის ერთ-ერთი მიზეზი ქორწინება იყო.

49 წლის მსახიობმა Howard Stern Show-ში სტუმრობისას აღნიშნა, რომ ჯენიფერ გარნერთან ქორწინებამ ნაწილობრივ განაპირობა მისი ალკოჰოლიკობა:

"ალბათ, ახლაც დალევას გავაგრძელებდი [ისევ რომ ერთად ვიყოთ]. ეს იყო ერთ-ერთი მიზეზი, რის გამოც დალევა დავიწყე... რადგან თავს მახეში გაბმულად ვგრძნობდი. ვფიქრობდი: 'ბავშვების გამო მისი მიტოვება არ შემიძლია, მაგრამ რა ვქნა, რომ უბედური ვარ?' ამის გამო ბოთლით სკოჩს ვსვამდი და დივანზე ვიძინებდი, რაც სულაც არ იყოს კარგი გამოსავალი", — ამბობს აფლეკი.

ცნობილია, რომ ბენ აფლეკი სხვადასხვა დროს გადიოდა სარეაბილიტაციო მკურნალობას ალკოჰოლთან დაკავშირებული პრობლემების გამო, მათ შორის 2001 და 2017 წლებში.

2018 წელს ოფიციალურად დაადასტურა, რომ ის და ჯენიფერ გარნერი დაშორდნენ. წყვილმა 2005 წელს იქორწინა და სამი საერთო შვილი ჰყავთ.

ფოტო: ALBERTO E. RODRIGUEZ/WIREIMAGE

The Gone Girl (გაუჩინარებული ქალი) ვარსკვლავმა ისიც აღნიშნა, რომ მათ ურთიერთობის შესანარჩუნებლად ყველაფერი იღონეს, მაგრამ წარმატებას ვერ მიაღწიეს:

"ჩვენმა ქორწინებამ არ გაამართლა, რაც ხდება ხოლმე. შეიძლება გიყვარდეს ადამიანი და პატივს სცემდე, მაგრამ მასთან ქორწინებაში ყოფნა აღარ გინდოდეს. ჩვენ შვილების გამო ყველაფერი ვცადეთ, რადგან არ გვინდოდა, მათთვის ქორწინების მსგავსი ფორმა გამხდარიყო სამაგალითო".

ბენ აფლეკმა 2020 წელს განაცხადა, რომ ბეტმენის როლზე უარის თქმა სწორედ ალკოჰოლიზმის გამო მოუწია. მაშინდელ ინტერვიუში იმასაც გაუსვა ხაზი, თუ როგორ შეუქმნა ამ გარემოებამ პრობლემა მის ქორწინებასაც:

"დიდი ხნის განმავლობაში ჩვეულებრივად ვსვამდი, თუმცა, ერთხელაც უფრო მეტად მოვუხშირე ალკოჰოლის მიღება და ჩემმა ქორწინებამაც განადგურება დაიწყო. ეს ყველაფერი 2015-16 წლებში დაიწყო და ამან, რა თქმა უნდა, ცოლ-ქმრული პრობლემები გამოიწვია. მე ძალიან ბევრი შეცდომა დავუშვი, რომელთაც ახლა ვნანობ, თუმცა ვცდილობ ფეხზე კვლავ წამოვდგე, ამ გამოცდილებით გაკვეთილი მივიღო და ცხოვრება გავაგრძელო", — იხსენებს მსახიობი.