ცენტრ ემპათიის ნევროლოგის, ოთარ თოიძის განცხადებით, ექსპრეზიდენტ მიხეილ სააკაშვილისთვის საჭიროა სპეციალიზებული დაწესებულება, რომლის მოძიება საქართველოში ვერ მოხერხდა. როგორც თოიძემ აღნიშნა, მესამე პრეზიდენტის ნევროლოგიური სტატუსი მის დაავადებაში წამყვანია.

"მას სიარულის, კოორდინაციის პრობლემა აქვს, ხასიათის მერყეობები, თუმცა ეს არ სცილდება ნორმატიულ ფარგლებს. ის, ძირითადად, ახლა საჭიროებს სპეციალურ რეაბილიტაციას, ჩვენ მას ვეძახით ნეირო რეაბილიტაციას, რომლის საშუალება ჩვენ საქართველოში ვერ მოვიძიეთ იმ მოცულობითა და სიღრმით, რაც საჭიროა ამ მოცემულობით პაციენტის მკურნალობისათვის. მისთვის საჭიროა სპეციალიზიებული დაწესებულება, რომელიც საქართველოში ეჭვი მეპარება, ჩვენ კიდევ მოვიძიოთ და ლაპარაკი იყო უცხოეთში მის გადაყვანაზე", — განაცხადა ნევროლოგმა ჟურნალისტებთან.

ის გორის სამხედრო ჰოსპიტალში მიხეილ სააკაშვილის მდგომარეობის გასაცნობად სახალხო დამცველთან და სამედიცინო ექსპერტთა ჯგუფთან ერთად იმყოფებოდა. სააკაშვილის უფლებრივ მდგომარეობაზე საუბრისას ნინო ლომჯარიამ განაცხადა, რომ მესამე პრეზიდენტს სასეირნოდ ღია სივრცე არ აქვს. ომბუდსმენის თქმით, როგორც პაციენტს მას მეტი ფიზიკური დატვირთვა სჭირდება.

ექსპერტთა ჯგუფის წევრის, ფსიქიატრ მარინა კურატაშვილის თქმით, არის გარკვეული პრობლემები ფსიქიკური სფეროს მხრივ, მაგრამ დიაგნოზზე ფსიქიატრი ჯერ ვერ საუბრობს.

სააკაშვილის პირადმა ექიმმა, ნიკოლოზ ყიფშიძემ განაცხადა, რომ სააკაშვილს ჯანმრთელობის სამი ახალი პრობლემა გაუჩნდა, რომელიც მას ადრე არ ჰქონდა. ყიფშიძის თქმით, ესენია: კუჭ-ნაწლავის დაავადებები, ნეიროდეფიციტი და ანემია.

ექსპრეზიდენტი რუსთავის პენიტენციური დაწესებულებიდან გორის სამხედრო კლინიკაში 19 ნოემბერს, 50-დღიანი შიმშილობის შემდეგ გადაიყვანეს. უკრაინაში მცხოვრები სააკაშვილი საქართველოში სექტემბრის ბოლოს, საარჩევნოდ დაბრუნდა, რომლის შემდეგაც ის პირველ ოქტომბერს დააკავეს. დაკავების პირველივე დღიდან მან შიმშილობა გამოაცხადა. შიმშილობა გაგრძელდა გლდანის მე-18 დაწესებულებაშიც, სადაც მისი განცხადებით, მოტყუებითა და იძულებით გადაიყვანეს. სააკაშვილმა შიმშილობა მას შემდეგ შეწყვიტა, რაც იუსტიციის სამინისტრომ გორის სამხედრო ჰოსპიტალში გადაყვანა შესთავაზა.