გორის სამხედრო ჰოსპიტალში ექსპრეზიდენტ მიხეილ სააკაშვილის უფლებრივ მდგომარეობაზე საუბრისას სახალხო დამცვლი აცხადებს, რომ მესამე პრეზიდენტს სასეირნოდ ღია სივრცე არ აქვს. მისივე თქმით, როგორც პაციენტს მას მეტი ფიზიკური დატვირთვა სჭირდება. ომბუდსმენი გორის სამხედრო ჰოსპიტალში სამედიცინო ექსპერტთა ჯგუფთან ერთად იმყოფებოდა.

"მიხეილ სააკაშვილმაც მითხრა, რომ მხოლოდ ეს დისციპლინური სასჯელი გამოიხატა საუბრის უფლების შეზღუდვაში, რაც ისედაც შეზღუდული ჰქონდა მას, სხვადასხვა მიმდინარე საქმიდან გამომდინარე. დღეს ტელევიზორს უყურებს. თუმცა რაც პრობლემურად მეჩვენება ღია სივრცე არ აქვს, სადაც როგორც პატიმარი ისარგებლებდა სეირნობის უფლებით. ასევე, როგორც ვიცი, როგორც პაციენტსაც მას სჭირდება უფრო მეტი ფიზიკური დატვირთვა და ეს პრობლემურად მეჩვენება. ეს საკითხებიც იქნება განხილული", — განაცხადა ლომჯარიამ სააკაშვილის მონახულების შემდეგ.

მისივე თქმით, ყველა სპეციალისტმა ყველა მიმართულებით შეისწავლა პაციენტის საქმე ძალიან დეტალურად. ასევე, ჩატარდა მისი უშუალო გასინჯვა.

"პარალელურად მიმდინარეობდა მის მკურნალ ექიმთან და სამედიცინო პერსონალთან გასაუბრება, მივიღეთ ინფორმაციები, ყველას აქვს საკუთარი მიმართულებით ინფორმაცია, რომელსაც შეჯერება სჭირდება. შეჯერების შემდეგ კი დასკვნა საჯაროდ გავრცელდება, რეკომენდაციებითა და შეფასებებით", — აღნიშნავს ლომჯარია.

ექსპერტთა ჯგუფის წევრის, ფსიქიატრ მარინა კურატაშვილის თქმით, არის გარკვეული პრობლემები ფსიქიკური სფეროს მხრივ, მაგრამ დიაგნოზზე ფსიქიატრი ჯერ ვერ საუბრობს.

ექსპრეზიდენტი რუსთავის პენიტენციური დაწესებულებიდან გორის სამხედრო კლინიკაში 19 ნოემბერს, 50-დღიანი შიმშილობის შემდეგ გადაიყვანეს. უკრაინაში მცხოვრები სააკაშვილი საქართველოში სექტემბრის ბოლოს, საარჩევნოდ დაბრუნდა, რომლის შემდეგაც ის პირველ ოქტომბერს დააკავეს. დაკავების პირველივე დღიდან მან შიმშილობა გამოაცხადა. შიმშილობა გაგრძელდა გლდანის მე-18 დაწესებულებაშიც, სადაც მისი განცხადებით, მოტყუებითა და იძულებით გადაიყვანეს. სააკაშვილმა შიმშილობა მას შემდეგ შეწყვიტა, რაც იუსტიციის სამინისტრომ გორის სამხედრო ჰოსპიტალში გადაყვანა შესთავაზა.