დაავადებათა კონტროლის ეროვნული ცენტრის დირექტორი, ამირან გამყრელიძე მოსახლეობას ახალი წლის შეკრებების რაც შეიძლება მოკრძალებულად გამართვისკენ მოუწოდებს. გამყრელიძის თქმით, მნიშვნელოვანია პირბადის ტარება და იმ რეგულაციების დაცვა, რაც ქვეყანაში მოქმედებს.

"სიკვდილიანობა არ შემცირდება, სანამ ყოველდღიური ახალი შემთხვევების რაოდენობა 1 000-ს ქვემოთ არ ჩამოვა. მოგეხსენებათ, ახალი წელი ჩვენთვის ერთ-ერთი ყველაზე დიდი დღესასწაულია, ამიტომ უნდა ვეცადოთ, რაც შეიძლება მოკრძალებული გვქონდეს ეს დღესასწაული. ანუ, თავი ავირიდოთ ძალიან დიდ შეკრებებს. ყველგან ვიყოთ პირბადით, იქნება ეს შიდა, ანუ დახურული სივრცე, თუ იქნება გარე სივრცე. ყველა შეკრება იქნება, ბავშვებისთვის კონცერტი თუ სხვა ასეთი ღონისძიებები, ადამიანები იყვნენ იქ აცრილი, ანუ დაუშვან მხოლოდ მწვანე პასპორტებით", — თქვა გამყრელიძემ პირველ არხთან.

11 დეკემბრის მონაცემებით, საქართველოში კორონავირუსის 3 542 ახალი შემთხვევა დადასტურდა, გამოჯანმრთელდა — 2 234, ხოლო გარდაიცვალა — 64 ადამიანი. ხოლო Covid-19-ის პანდემიის გავრცელებიდან დღემდე დადასტურებული შემთხვევების საერთო რაოდენობა შეადგენს 886 364-ს, მათგან გამოჯანმრთელდა — 827 676, ხოლო ვირუსს ჯამში 12 695 ადამიანი ემსხვერპლა.