პარლამენტის თავმჯდომარე, კახა კუჭავა ერიკა ოლსონის განცხადებასთან დაკავშირებით ამბობს, რომ მათ აქვთ უფლება მსგავსი წუხილები გამოთქვან, რომელსაც სრულიად იზიარებს.

"ერიკა ოლსონის განცხადებას თუ მოუსმენდით, არამხოლოდ ამ გამონაკლისს, ძალიან ბევრი პოზიტიური და მნიშვნელოვანი მესიჯი იქნა გაჟღერებული ორი ქვეყნის ურთიერთობებს შორის. რა თქმა უნდა, იყო წუხილებიც, რომელიც კონკრეტულად ეხებოდა სასამართლო რეფორმასთან დაკავშირებულ პოზიციებს, რომელიც ადრეც მოგვისმენია.

ძალიან მნიშვნელოვანია, კიდევ ერთხელ გავითვალისწინებთ და იქვე იქნა მისი მხრიდან აღნიშნული ზუსტად მეგობრები რომ ვართ და სტრატეგიული პარტნიორები, ამიტომ აქვთ მათ უფლება, რომ მსგავსი წუხილები გამოთქვან, რომელსაც სრულიად ვიზიარებ", — განაცხადა კუჭავამ.

ამერიკის ხმის ინფორმაციით, აშშ-ის სახელმწიფო მდივნის თანაშემწის მოადგილემ, ერიკა ოლსონმა განაცხადა, რომ საქართველოს მთავრობამ ზოგიერთ დემოკრატიულ პროცესს "ძირი გამოუთხარა". ოლსონმა აღნიშნა, რომ სურს, შესრულდეს საარჩევნო და სასამართლო რეფორმები.