ჩინელი წყვილის ცხოვრება სამუდამოდ შეიცვალა, როდესაც 2007 წელს მათი 4 წლის შვილი გაიტაცეს. სან ჰეიენგმა და პენგ სუიონგმა 14-წლიანი ძებნის შემდეგ დაკარგული შვილი იპოვეს. მშობლებს დიდი ხნის ოცნება აუხდათ და ნანატრი შვილი გულში ჩაიკრეს.

შვილის მოსაძებნად წყვილმა ქონების დიდი ნაწილი გაყიდა. ინფორმაციის მოსაპოვებლად მათ $31 ათასის ოდენობის ჯილდოც კი დააწესეს. მამამ ბავშვის საპოვნელად ჩინეთის თითქმის ყველა რეგიონი შემოიარა. ამ საოცარი ისტორიის მიხედვით 2014 წელს ფილმი Dearest გადაიღეს.

ფოტო: Getty Images

პოლიციამ ბიჭის მოსაძებნად სახის ამომცნობი ტექნოლოგია გამოიყენა. თავდაპირველად მის სავარაუდო გამტაცებელს მიაგნეს, რომელმაც საბოლოოდ წყვილი დაკარგულ შვილამდე მიიყვანა. დნმ-ის ანალიზმა დაადასტურა, რომ 18 წლის სანი ნამდვილად წყვილის შვილია.

გულისამაჩუყებელი ისტორიის მიუხედავად, ახლა უკვე 18 წლის სანი აცხადებს, რომ მშვილებლებთან დარჩენას აპირებს, რადგან ისინი მას 14 წლის განმავლობაში ღვიძლი შვილივით ზრდიდნენ. სანის თქმით, რადგანაც სიმართლე წლების განმავლობაში არ იცოდა, არაბიოლოგიური მშობლები მაინც უყვარს.

ფოტო: Getty Images

ეს ჩინეთში ბავშვის გატაცების ერთადერთი ისტორია როდია. გარკვეული დროის განმავლობაში ჩინეთში მოქმედებდა კანონი, რომლის მიხედვითაც ოჯახებს ერთზე მეტი შვილის ყოლა ეკრძალებოდათ. მშობლებს ერჩივნათ, მათი ერთადერთი შვილი ბიჭი ყოფილიყო, რის გამოც წლების განმავლობაში პატარა ბიჭებს ძალიან ხშირად იტაცებდნენ.

აღსანიშნავია, რომ მსგავსი ისტორია ჩინელ გუო განგტანგსაც გადახდა, რომელიც გატაცებულ შვილს 24 წლის განმავლობაში ეძებდა. შვილის მოსაძებნად ახლა უკვე 51 წლის გუომ თითქმის მთელი ჩინეთი შემოიარა. ის ინფორმაციის შეგროვებას ნებისმიერი ხერხით ცდილობდა და უცნობებს დაკარგული შვილის ფოტოს უჩვენებდა. რამდენჯერმე საგზაო შემთხვევაში მოხვდა, ხიდის ქვეშაც ხშირად ეძინა, როცა სასტუმროში დასარჩენად ფული გამოელია. მამამ მოგზაურობისას 10 მოტოციკლი გამოიცვალა და 480 000-ზე მეტი კილომეტრი გაიარა.

ამავე თემაზე: