საგარეო საქმეთა სამინისტროს სტრატკომი პარტია დროას წევრი ბათუ ქუთელიას განცხადებას უსაფუძვლოს უწოდებს და აცხადებს, რომ საგარეო საქმეთა მინისტრმა, დავით ზალკალიანმა 2 დეკემბერს ეუთოს მინისტერიალზე სიტყვით გამოსვლისას დაგმო რუსეთის მტრული რიტორიკა უკრაინის მიმართ და გამოხატა საქართველოს ურყევი მხარდაჭერა უკრაინის სუვერენიტეტის, ტერიტორიული მთლიანობის მიმართ საერთაშორისოდ აღიარებულ საზღვრებში.

"პარტია "დროას" წარმომადგენელის, ბათუ ქუთელიას, მორიგი უსაფუძვლო ბრალდება საქართველოს ხელისუფლებისა და საგარეო საქმეთა სამინისტროს წინააღმდეგ, თითქოს, ჩვენ არ გამოვხატავთ უკრაინის მხარდამჭერ პოზიციას უკრაინაში მიმდინარე პროცესების ფონზე.

სამწუხაროა, რომ ქართველი პოლიტიკოსების მხრიდან კვლავ ხდება მსგავსი თემებით სპეკულაცია, თან ისე, რომ ისინი საფუძვლიანად არ ეცნობიან სამინისტროს მიერ გავრცელებულ განცხადებებსა და ინფორმაციას.

საგარეო საქმეთა მინისტრმა, დავით ზალკალიანმა, 2021 წლის 2 დეკემბერს, ეუთო-ს მინისტერიალზე სიტყვით გამოსვლისას, ეუთო-ს წევრი 57 ქვეყნის საგარეო საქმეთა მინისტრის, მათ შორის, რუსეთის ფედერაციის საგარეო საქმეთა მინისტრის თანდასწრებით, დაგმო რუსეთის მტრული რიტორიკა სტრატეგიული პარტნიორის, უკრაინის მიმართ და ასევე, დაგმო რუსეთის მხრიდან უკრაინის საზღვრის სიახლოვეს სამხედრო ქმედებების ინტენსიფიცირება. მან გამოხატა საქართველოს ურყევი მხარდაჭერა უკრაინის სუვერენიტეტისა და ტერიტორიული მთლიანობის მიმართ საერთაშორისოდ აღიარებულ საზღვრებში", — აღნიშნულია განცხადებაში.

პარტია დროამ მოუწოდა საგარეო საქმეთა სამინისტროს, გამოხატოს მხარდაჭერა უკრაინის მიმართ და მკაფიო განცხადება გააკეთოს. დროას წევრი ბათუ ქუთელია ამბობს, რომ მიესალმება ამერიკის შეერთებული შტატების პრეზიდენტ ჯო ბაიდენის მიერ რუსეთის პრეზიდენტ ვლადიმერ პუტინთან ვიდეოზარისას დაფიქსირებულ პოზიციას.