უცხოური ვალუტის იპოთეკური სესხების მაქსიმალური ვადა 15-დან 10 წლამდე შემცირდება. ეს გადაწყვეტილება ეროვნული ბანკის ფინანსური სტაბილურობის კომიტეტმა მიიღო.

ეროვნული ბანკის განმარტებით, უცხოურ ვალუტაში გაცემული სესხების მოცულობა მზარდია, რის გამოც შესაძლებელია ფინანსურ სექტორში სისტემური რისკები გაიზარდოს. სებ-ის თქმით, მსესხებელთა უმეტესობას რისკები დაზღვეული არ აქვს, რაც მათ მოწყვლადობაზე მიანიშნებს.

"2021 წლის აპრილიდან, ეკონომიკის აღდგენისა და მონეტარული პოლიტიკის გამკაცრების პარალელურად, უცხოური ვალუტის იპოთეკური სესხების ზრდა დაჩქარდა. არსებული ტენდენციის შენარჩუნების შემთხვევაში, ასეთი სესხების წლიური ზრდის ტემპი 2022 წელს 10% ს მიაღწევს. აღსანიშნავია, რომ მსესხებლების უმეტესობა არაჰეჯირებულია, რაც მათ მაღალ მოწყვლადობაზე მიანიშნებს და, პორტფელის ზომიდან გამომდინარე, ხელს უწყობს ფინანსურ სექტორში სისტემური რისკების დაგროვებას. ეს, ასევე, საფრთხეს უქმნის უძრავი ქონების ბაზრის მდგრადობას", — ნათქვამია სებ-ის განცხადებაში.

ეროვნული ბანკის განმარტებით, იპოთეკური სესხების ძირითადი ნაწილი ცვლადგანაკვეთიანია, შესაბამისად, სესხებს გაცვლითი კურსის რისკთან ერთად თან ახლავს საპროცენტო რისკი.

სებ-ში ამბობენ, რომ უცხოური ვალუტის იპოთეკური სესხების მაქსიმალური ვადის შემცირება აღნიშნულ მოწყვლადობებს შეამსუბუქებს, შეამცირებს საკრედიტო რისკებს და ხელს შეუწყობს დედოლარიზაციას.