30 წელზე მეტი გავიდა, რაც მარტო სახლში და მაკკალისტერების ოჯახის თავგადასავალი შობა-ახალი წლის განუყოფელ ნაწილად იქცა. როგორც ჩანს, მსახიობები, რომლებიც კევინის ოჯახის წევრებს განასახიერებენ, ამ წლების განმავლობაში ნამდვილ ოჯახად იქცნენ და შესაძლოა, მალე შეიკრიბონ და გულშემატკივრები გაახარონ.

ცოტა ხნის წინ გამოცემა People-ისთვის მიცემულ ინტერვიუში დევინ რეტრეიმ, რომელიც ფილმში კევინის უფროს ძმას, ბაზს განასახიერებს, აღნიშნა, რომ მსახიობები საერთო ჩატში შეკრებას გეგმავენ.

"ოჯახს შეკრებისთვის თავისი გეგმები აქვს. ვინ იცის, რა იქნება მომავალში?", — განაცხადა დევინმა.

როგორც აღმოჩნდა, დევინი მაკკალისტერების ოჯახის სხვა წევრებთან ურთიერთობას ინარჩუნებს. აღსანიშნავია, რომ შეკრებაზე საუბრისას მას რამდენიმე მსახიობი, მათ შორის, მაკოლეი კალკინი (კევინი) და კეტრინ ო'ჰარა (ბავშვების დედა) არ უხსენებია. ამის მიუხედავად, ვინ იცის, რაზეა წამსვლელი მაკკალისტერების ოჯახი, რომ ახალ წელს ერთად შეხვდნენ?!

აღსანიშნავია, რომ ფილმის ცნობილი სახლი საახალწლოდ Airbnb-ზე ქირავდება. სახლი, რომელშიც კევინ მაკკალისტერმა შობის ღამე მშობლების გარეშე გაატარა, ახლა იღბლიან ადამიანთა ჯგუფს უმასპინძლებს, რომელიც მოახერხებს და დაჯავშნას სხვებს დაასწრებს. ეს ცნობილი სახლი ილინოისის შტატის პატარა სოფელ უინეტკაში მდებარეობს, ხოლო სტუმებს თავად დევინ რეტრეი უმასპინძლებს. ვინ იცის, იქნებ სწორედ ეს სახლში აღმოჩნდეს ოჯახის შეკრების ადგილი?

"ეს ფილმი ერთგვარ ტრადიციად იქცა, რომელიც ოჯახებში თაობების განმავლობაში გრძელდება. მშობლები შვილებს, შვილები კი შვილიშვილებს აყურებინებენ იმას, რისი ნაწილიც მე ვიყავი. წარმოდგენა არ მაქვს, როგორი იქნებოდა ჩემი ცხოვრება მარტო სახლშის გარეშე", — ამბობს რეტრეი.

ამბობენ, რომ შობა-ახალ წელს სასწაულები ხდება, ამიტომ გამორიცხული არაა, ჩვენს საყვარელ დღესასწაულებზე ჩვენი საყვარელი ოჯახი კიდევ ერთხელ ვიხილოთ.

ამავე თემაზე: