ექსპრეზიდენტი მიხეილ სააკაშვილი მიესალმება ინსპექტორის სამსახურის გადაწყვეტილებას. მისი თქმით, ეს ნიშნავს, რომ საქართველოში არსებობს მინიმუმ 2 დამოუკიდებელი სახელმწიფო ინსტიტუტი.

"მივესალმები სახელმწიფო ინსპექტორის გადაწყვეტილებას, ჩემი უფლებების დარღვევის დადგენის თაობაზე და იუსტიციის სამინისტროსთვის შემდგომი ასეთი ქმედებების აკრძალვას. ეს ნიშნავს, რომ საქართველოში არსებობს მინიმუმ 2 დამოუკიდებელი სახელმწიფო ინსტიტუტი — სახალხო დამცველის და სახელმწიფო ინსპექტორის სახით. ნიშანდობლივია, რომ ორივეს ქალი ხელმძღვანელობს", — წერს სააკაშვილი.

სახელმწიფო ინსპექტორის სამსახურმა მიხეილ სააკაშვილის კადრების გავრცელების გამო იუსტიციის სამინისტრო და პენიტენციური სამსახური დააჯარიმა და მათი წაშლა დაავალა. მათი გადაწყვეტილებით, ორივე უწყებას ადმინისტრაციული პასუხისმგებლობა დაეკისრათ, პერსონალურ მონაცემთა დაცვის შესახებ საქართველოს კანონის 44-ე მუხლით გათვალისწინებული ადმინისტრაციული სამართალდარღვევის რამდენიმე ეპიზოდისთვის.

კერძოდ, ინსპექტორმა დარღვევად მიიჩნია ინფორმაციის გასაჯაროება ექსპრეზიდენტის მიერ წვენებისა და თაფლის შეძენისა და კვების რაციონის შესახებ. ასევე, უწყებამ დარღვევად შეაფასა საკვები დანამატების მიღების, რუსთავის ციხის დატოვების, რეანომობილში ყოფნისა და გლდანის ციხეში იძულებით შეყვანის კადრების გასაჯაროებაც.

სახელმწიფო ინსპექტორმა გადაწყვეტილებაში განმარტა, რომ #12 პენიტენციური დაწესებულების დატოვების ამსახველი ვიდეოჩანაწერის გასაჯაროება იმის დემონსტრირებისთვის, რომ სააკაშვილმა ნამდვილად საკუთარი ნებით დატოვა დაწესებულება, ვერ ჩაითვლება კანონიერად, ვინაიდან საპირისპირო დასტურდება შემოწმების ფარგლებში მოპოვებული მტკიცებულებებით, მათ შორის #18 დაწესებულებაში მისი იძულებით შესახლებისა და რეანომობილში გადაღებული აუდიო-ვიდეოჩანაწერების დათვალიერებით. ინსპექტორის თქმით, ბუნდოვანია, რა ლეგიტიმურ მიზანს ემსახურებოდა და რატომ იყო აუცილებელი ამ სახის ინფორმაციის გავრცელება.

გლდანის ციხეში იძულებით შესახლების კადრების გასაჯაროებასთან დაკავშირებით კი ინსპექტორმა განაცხადა, რომ სააკაშვილის პოლიტიკური სტატუსის, ცნობადობის, მის მიმართ მაღალი საზოგადოებრივი ინტერესის, ვიდეოჩანაწერის შინაარსისა და გასაჯაროების წინასწარ განჭვრეტადი შედეგების გათვალისწინებით, მისი ამგვარ ფორმაში და ვითარებაში ფართო საზოგადოებისთვის წარდგენა, მონაცემთა სუბიექტის ღირსების შემლახავი ფორმით მონაცემების დამუშავებაა.

რაც შეეხება წნევის, პულსის, სატურაციის, გლუკოზის მონაცემებს, რომელიც უწყებამ 10 ოქტომბერს გაავრელა, ინსპექტორის განცხადებით, სააკაშვილის სასიცოცხლო მაჩვენებლების შესახებ ინფორმაციის გასაჯაროება იყო კანონიერი.