კულტურის მინისტრის, თეა წულუკიანის განცხადებით, 2012 წლამდე საელჩოებისთვის გადაცემული 117 ექსპონატიდან, 53 სავარაუდოდ, დაკარგულია. ამის შესახებ მან პარლამენტში მინისტრის საათის ფარგლებში ისაუბრა.

"2012 წლამდე საელჩოებისთვის გადაცემული 117 ექსპონატიდან, ძირითადად ეს არის ძვირადღირებული ფერწერული ტილოები, 53 სავარაუდოდ, დაკარგულია, შესაბამისად, აქ გამოძიება იქნება დასაწყები, როგორც კი ინვენტარიზაციის პროცესი დასრულდება. საელჩოებიდან გადარჩენილი ფერწერული ტილოების დაბრუნების პროცესი დაიწყო და ჩეხეთში ჩვენი საელჩო იყო ამ მხრივ პირველი მერცხალი, დანარჩენ საელჩოებს მეც და ჩემი კოლეგა საგარეო საქმეთა მინისტრი ვემუშავებით, რომ ის ექსპონატები დაბრუნდეს", — განაცხადა მან.

დღეს საქართველოს პარლამენტში კულტურის, სპორტისა და ახალგაზრდობის მინისტრს, თეა წულუკიანს უსმენენ. მან პლენარულ სხდომაზე სამინისტროს განხორციელებულ საქმიანობასა და სამომავლო გეგმებზე ისაუბრა. ის შეეხო ლიტერატურულ პრემიას ლიტერას, მას "კეზერაშვილის" უწოდა და განაცხადა, რომ სამინისტრო ამ პრემიას აღარ დაიბრუნებს.