ქუთაისის საკრებულოსთან ერთი ადამიანი დააკავეს. მას სხდომაზე შესვლა სურდა, რისი საშუალებაც სამართალდამცავებმა არ მისცეს. დაკავებული ზაალ კუხიანიძე საკრებულოს შენობასთან საარჩევნო კომისიის წევრის ფორმით იყო მისული და თან ჰქონდა ბანერები წარწერით: "გაბათილება ჩემზე იყოს" და "კარუსელი 41 ლარიდან".

"მაკავებენ იმიტომ, რომ მე მინდა ჩემი მოთხოვნები და ჩემი მესიჯები გავაჟღერო საკრებულოს სხდომაზე, რისი უფლებაც მაქვს", — განაცხადა მან.

იმის გასარკვევად, თუ რა მიზეზით და მუხლით დააკავეს კუხიანიძე On.ge შინაგან საქმეთა სამინისტროსთან ცდილობს დაკავშირებას. პასუხს მიღებისთანავე შემოგთავაზებთ.

დღეს, 3 დეკემბერს მეშვიდე მოწვევის საკრებულოების პირველი სხდომა იმართება, სადაც თავმჯდომარეებს, მათ მოადგილეებსა და კომისიის წევრებს აირჩევენ. რამდენიმე მუნიციპალიტეტის საკრებულოში ნაციონალური მოძრაობის წარმომადგენლებმა ახალმოწვეული საკრებულოს წევრის, ნუგზარ ფუტკარაძის ფოტოები მიიტანეს, რომლის გარდაცვალებასაც ისინი ზეწოლას უკავშირებენ.