ალაბამას შტატში მცხოვრებმა მედდამ, რომელსაც Walmart-ის მაღაზიაში ქურდობა დააბრალეს და კომპანია დაემუქრა, სასამართლოში საქმე მოიგო და ზიანის ანაზღაურებისთვის 2,1 მილიონ დოლარს მიიღებს.

მედდას სარჩელში ნათქვამია, რომ ის 2016 წლის ნოემბერში Walmart-ის სასურსათო მაღაზიიდან გასვლისას შეაჩერეს, იმის მიუხედავად, რომ პროდუქტების თანხა უკვე გადახდილი ჰქონდა. ამის დადასტურება მოსთხოვეს, მაგრამ ტექნიკური ხარვეზის გამო, ქალმა ქვითრის ჩვენება ვერ შეძლო. მაღაზიის თანამშრომლებმა მას არ დაუჯერეს და ქურდობისთვის დააკავეს.

ფოტო: CBS News

ამ საქმეზე გამოძიება ერთი წლის შემდეგ შეჩერდა, მაგრამ ქალმა წერილები მიიღო ფლორიდის იურიდიული ფირმისგან, რომელიც ემუქრებოდა, რომ თუ 200 დოლარს არ გადაიხდიდა, მის წინააღმდეგ სარჩელს შეიტანდნენ. ეს კი იმაზე გაცილებით დიდი თანხა იყო, ვიდრე იმ საკვების ღირებულება, რომლის ქურდობაშიც ადანაშაულებდნენ.

მედდა აღნიშნავს, რომ ის არ იყო ერთადერთი, ვისთვისაც Walmart-მა იურიდიულ ფირმას წერილის გაგზავნა დაავალა. "მაღაზიის ქურდობაში ბრალდებული ადამიანები ასეთ წერილებს იღებდნენ და კომპანია უდანაშაულო ადამიანებისგან ფულს ამ გზით აგროვებდა", — ნათქვამია მედდას სარჩელში.

სასამართლო პროცესზე დადასტურდა, რომ Walmart და სხვა მსხვილი კომპანიები მსგავს მეთოდს ხშირად მიმართავდა იმ შტატებში, სადაც კანონი ამის საშუალებას იძლეოდა და ამ გზით ბოლო ორ წელში სასურსათო მაღაზიამ ასობით მილიონი დოლარიც გამოიმუშავა.

Walmart-ის ადვოკატებმა განაცხადეს, რომ ალაბამაში ასეთი პრაქტიკა ლეგალურია. კომპანიის წარმომადგენელმა განაცხადა, რომ Walmart ამ განაჩენზე დათანხმებას არ აპირებს, რადგან არ სჯერა, რომ ის მტკიცებულებების საფუძველზეა მიღებული და ზიანის ასანაზღაურებლად დაწესებული თანხაც კანონით დაშვებულს ბევრად აღემატება.