გასული საუკუნის 90-იანი წლებიდან დღემდე, მსოფლიოს, ოთხი ყველასთვის ნაცნობი და საყვარელი მოდის კანონმდებელი პერსონაჟი ჰყავდა, ქერი, შარლოტა, მირანდა და სამანტა - HBO-ს საკულტო სერიალის სექსი დიდი ქალაქში გმირები.

სერიალი ეკრანზე 1998 წელს გამოვიდა და აშშ-ში მაშინვე ერთ-ერთ ყველაზე პოპულარულ სერიალად იქცა. მისი პერსონაჟები ამერიკის საყვარელ გმირებად დაასახელეს, ხოლო შოუს, რომელმაც ტაბუ მრავალ თემას ახადა, რევოლუციური და პროვოკაციული უწოდეს.

სერიალი ოთხი სრულიად განსხვავებული დაქალის ცხოვრებას გვიყვება, რომლებიც ნიუ-იორკში ცხოვრობენ. სამი მათგანი 30 წელსაა გადაცილებული, ერთი კი - 40-ს. სარა ჯესიკა პარკერმა, კრისტენ დევისმა, სინტია ნიქსონმა და კიმ კეტრელმა ქალის ოთხი უნივერსალური ტიპი მოირგეს: ბოჰემური ჟურნალისტი ქერი, რომანტიკული და ტრადიციების მოყვარული შარლოტა, საქმიანი მირანდა და სექსუალური სამანტა.

ალბათ ყველას კარგად გახსოვთ სერიალის ქუდი და სარა ჯესიკა პარკერის კაბა, რომელიც დღემდე მოდურად ითვლება.

თუმცა, როგორც გაირკვა, თავდაპირველად კერის სულ სხვა კაბა ეცვა და სერიალის ქუდიც სულ სხვანაირად გამოიყურებოდა. აქამდე უცნობი კადრები მაყურებელს სარა ჯესიკა პარკერმა წარუდგინა.

Lost footage. The alternate and never used title sequence from "SATC" A really nice memory. X, SJ

A post shared by SJP (@sarahjessicaparker) on

შოუს კოსტიუმების დიზაინერი პატრისია ფილდი ამბობს, რომ კაბა, რომელიც სარას ქუდში აცვია სულ რაღაც $5 დაჯდა და ის მეორადების მაღაზიაში შემთხვევით აღმოაჩინეს.

"მე და სარა ჯესიკას დიდი კამათი გვქონდა, საბოლოოდ სარამ გაიმარჯვა და მარკ ჯაკობსის ნაცვლად მეორადებში ნაყიდი კაბა დავტოვეთ. როგორც აღმოჩნდა სარა მართალი იყო, ეს გენიალური გადაწყვეტილება იყო", - ამბობს სერიალის შემქმნელი დარენ სტარი.

სერიალის ბოლო სერია ეთერში 2004 წლის 22 თებერვალს გავიდა. ოთხი წლის შემდეგ კი, ნიუ-იორკული ოთხეული მაყურებელს კვლავ დაუბრუნდა, ამჯერად კინოეკრანებზე. ფილმი გამოსვლის დღიდან გაქირავების ლიდერი გახდა და $400 მილიონზე მეტი მოაგროვა.

სექსი დიდ ქალაქში 2 კი, რომელიც 2010 წელს ჩაეშვა კინოგაქირავებაში, კრიტიკის ქარ-ცეცხლში გაატარეს. მაგალითად თაიმსის კრიტიკოსი წერდა: "ეს არ არის სექსი დიდ ქალაქში, ეს არის მენოპაუზა უდაბნოში და ოთხი დიდებული პერსონაჟის გაცდენა".

The Mirror-ის ჟურნალისტმა სერიალის მოყვარულებს იმისკენაც კი მოუწოდა, რომ არ წასულიყვნენ ფილმის სანახავად, რადგან მიაჩნდა, რომ ეს იგივეა, ორსაათ-ნახევრის განმავლობაში უყურო საყვარელი მეგობრის სასტიკ მკვლელობას.

სარა ჯესიკა პარკერმა, რომელიც ამჟამად HBO-ს ახალ სერიალ განქორწინებაში მთავარ როლს ასრულებს, Fame Focus-თან საუბრისას თქვა, რომ სექსი დიდ ქალაქში 3-ის გადაღების იდეა არსებობს და ის ერთ დღეს აუცილებლად იქცევა რეალობად.

"იცით, როდესაც მე ქერი ბრედშოუს ვთამაშობდი ეს ჩემთვის დიდი პრივილეგია იყო. წარმოიდგინეთ, შოუს თითო ეპიზოდს, მინიმუმ 10 მილიონი ადამიანი უყურებდა, ამიტომ თუნდაც მათთვის ღირს კიდევ ერთხელ შეიკრიბოს ნიუ-იორკული ოთხეული. ხომ გესმით რას ვამბობ? მე ვგრძნობ პასუხისმგებლობას მათ მიმართ და თითქმის ყოველდღე ვფიქრობ, რომ სერიალის ახალი სეზონი თუ არა, ფილმის კიდევ ერთი ნაწილი მაინც უნდა გავაკეთოთ", - ამბობს სარა ჯესიკა პარკერი.

იგივე აზრს იზიარებს ჯონ კორბეტმა, რომელიც სერიალში ეიდენ შოს როლს ასრულებდა. მსახიობმა HuffPost Live-ს ეთერში თქვა, რომ ისტორია ჯერ არ დასრულებულა.

“გოგონები დღესაც არაჩვეულებრივ ფორმაში არიან, მგონია და აუცილებელიც არის, რომ ისინი კიდევ ერთხელ გაერთიანდნენ, რადგან ისტორია ჯერ არ დასრულებულა”, თქვა პირდაპირ ეთერში კორბეტმა.

ასე, რომ თუ მთავარი როლის შემსრულებელი ქალბატონები ვა-ბანკზე წავლენ, შესაძლებელია სერიალად, შემდეგ კი ფილმად ქცეული წიგნის კიდევ ერთი ეკრანიზაცია ვიხილოთ ისტორიაზე სადაც ქერი, სამანტა, მირანდა და შარლოტა კიდევ ერთხელ დაგვარწმუნებენ, რომ არაფერია იმაზე კარგი, ვიდრე მეგობრობა, სიყვარული და სექსი დიდ ქალაქში.