ტელეკომპანია იმედი საინფორმაციო ტიპის დილისა და შუადღის გადაცემების დაწყებას გეგმავს. ახალი გადაცემისთვის პოზიცია შეუცვალეს იმედის დროს ოთხ თანამშრომელს პროდიუსერს - სოფო ნიკოლაიშვილს და ჟურნალისტებს - სოფო მთივლიშვილს, ხათუნა გაგნიძესა და მარიკა ბაკურაძეს. ცვლილებებთან დაკავშირებით On.ge-ს სოფო ნიკოლაიშვილი ესაუბრა.

როგორც ნიკოლაიშვილი ამბობს, მისთვის ამ ეტაპზე გადაცემის ზუსტი ფორმატი ცნობილი არაა, თუმცა, იცის, რომ უფრო მეტად საინფორმაციო ტიპის გადაცემა იქნება და ქვეყანაში მიმდინარე სიახლეებს შეეხება.

"ადრეც იყო შემოთავაზება, მაშინ ცოტა თავი შევიკავე. დღის წესრიგში იდგა, როგრც ჩანს. ახლა, უბრალოდ, დასჭირდათ და გადამიყვანეს. სურვილი, რა თქმა უნდა, არის, ახალი გამოწვევაა და მაინტერესებს.

იმედის დროს წამყვანი, ირაკლი ჩიხლაძე ამბობს, რომ არხზე "გადანაწილება" ხდება და შესაძლოა, ახალი თანამშრომლები სხვა არხებიდანაც დაემატოთ.

"ვიწყებთ ახალ პროექტებს და იქ უნდა გააკეთონ ძირითადი სიუჟეტები და პარალელურად, რაც იქნება ანალიტიკა, ალბათ, გაკეთდება კვირისთვის. ერთი სივრცე კეთდება ნიუსრუმისთვის, აქ ასეთი სერიოზული გადაჯგუფებები არ არის," - აღნიშნა ჩიხლაძემ On.ge-სთან საუბრისას და დასძინა, რომ ის წასვლას არსად აპირებს.

არხზე მიმდინარე ცვლილებებთან დაკავშირებით On.ge-მ იმედის გენერალურ დირექტორს, გიორგი ბახტაძეს დაურეკა, თუმცა, შეხვედრის გამო, მან საუბარი ვერ შეძლო.