Manchester United-ის მწვრთნელად ჟოზე მოურინიოს დანიშვნის შესახებ ოფიციალური განცხადება კლუბის Facebook გვერდმა გაავრცელა.

"მოხარულები ვართ, გაცნობოთ, რომ ჟოზე მოურინიო ჩვენი ახალი მწვრთნელია", წერს კლუბის გვერდი. თანდართულ ფოტოზე მოურინიო მანჩესტერ იუნაიტედის მაისურით ხელშია აღბეჭდილი.

თავად ახალი მწვრთნელის თქმით, მანჩესტერ იუნაიტედის მწვრთნელობა განსაკუთრებული პატივია:

"ეს არის კლუბი, რომელიც მთელს მსოფლიოში უყვართ. აქ ისეთი მისტიკა და რომანტიკაა, რომელსაც ვერც ერთ სხვა კლუბში შეხვდები."

მოურინიო მსოფლიოში ერთ-ერთი წარმატებული მწვრთნელია. ის სხვადასხვა დროს პორტოს, მილანის ინტერს, მადრიდის რეალსა და ლონდონის ჩელსის წვრთნიდა. რამდენჯერმე აქვს მოგებული ადგილობრივი ჩემპიონატები, ჩემპიონთა ლიგა და უეფას თასი.

მოურინიოს დანიშვნას თავის ოფიციალურ გვერდზე მანჩესტერის ლეგენდარული მცველი, რიო ფერდინანდიც მიესალმა.

"ვულოცავ ჟოზეს, მსოფლიოში ყველაზე დიდი კლუბის მწვრთნელად დანიშვნას", წერს ფერდინანდი.

პრემიერ ლიგის 206-2017 წლის სეზონი 6 აგვისტოს დაიწყება. სეზონის მატჩების კალენდარი 15 ივნისს გამოქვეყნდება.