სახალხო დამცველის მიერ შექმნილი ექიმთა კონსილიუმის განცხადებით, მიხეილ სააკაშვილის მდგომარეობა კრიტიკულია. ექიმების დასკვნის მიხედვით, მკურნალობის გაგრძელება რეკომენდებულია ფუნქციურად გამართულ და დიდი გამოცდილების მქონე პოლიპროფილურ ჰოსპიტალში.

დაკვნის თანახმად, სააკაშვილის შიმშილობის 48 დღე დასტურდება და მისი მდგომარეობის რისკის განმსაზღვრელი ფაქტორებია:

  • ვერნიკეს ენცეფალოპათია;
  • პერსისტენტული ჰიპოკალემია — 08.11.2021-დან;
  • ანემია — თალასემია + გასტროინტესტინალური სისხლდენის მაღალი ალბათობა;
  • სრულყოფილ მკურნალობაზე უარის თქმა;
  • მაღალი სტრესული გარემო;

რაც შეეხება მოსალოდნელ გართულებებს უახლოეს მომავალში, დასკვნის მიხედვით, ეს შესაძლოა იყოს:

  • ვერნიკეს ენცეფალოპათიის დამძიმება — კომით, ეპილეფსიური სტატუსით;
  • ჰიპოკალემიით გამოწვეული ლეტალური არითმია, რაბდომიოლიზი, თირკმლის უკმარისობა;
  • გასტრო ინტესტინალური სისხლდენა;
  • ჰემოლიზი — თალასემია + ჰიპოფოსფატემია;
  • პულმონური ემბოლიზმი (იმობილიზაციის და დეჰიდრატაციის გამო);
  • გულის უკმარისობა;
  • შიმშილობის შეწყვეტის შემთხვევაში, კვების აღდგენის (რეფიდინგის) სინდრომი

ექიმების შეფასებით, აღნიშნული რისკების მქონე პაციენტის სამკურნალო დაწესებულებაში უნდა არსებობდეს შესაბამისი აღჭურვილობა და ინფრასტრუქტურა, ასევე, მულტიდისციპლინური სამედიცინო პერსონალი, რთული პაციენტის მართვის გუნდური გამოცდილება და პოლიპროფილური სამედიცინო მომსახურების 24-საათიანი და გადაუდებელი ხელმისაწვდომობა.

რაც შეეხება პაციენტის განთავსების სამკურნალო დაწესებულების სიტუაციური ანალიზს, მათი განცხადებით, ნანახი ფაქტობრივი მონაცემი მიუთითებს, რომ კლინიკა ამჟამად არის ფორმირების ეტაპზე — სამედიცინო აპარატურის ნაწილი არის ფუნქციური, ნაწილი გადის ტესტირების რეჟიმს. განცხადებაში აღნიშნულია ისიც, რომ მათთვის მიწოდებული ინფორმაციის თანახმად, სამედიცინო პერსონალის დასაქმება 3 კვირის წინ დაიწყო.

ამასთან, მონიტორინგის შედეგების მიხედვით, მაღალტექნოლოგიური გამოკვლევების ნაწილი არ არის ადგილზე, რის გამოც დახურული ციკლის შეკვრა შეუძლებელია, რაც ექიმების განმარტებით, პაციენტის კლინიკური მდგომარეობის დამძიმებისას მისი სხვა კლინიკაში გადაყვანის საჭიროების მოხსნას გულისხმობს.

დასკვნაში, ასევე, ვკითხულობთ, რომ სამედიცინო პერსონალის კუთხით, ამჟამად, ადგილზეა შინაგანი მედიცინის ექიმი და რეანიმაციული ბრიგადა, რომელიც 24 საათის განმავლობაში არის ხელმისაწვდომი, ხოლო პაციენტისათვის პოტენციურად საჭირო სპეციალისტების ნაწილი მუდმივად ადგილზე არ იმყოფება.

"მდგომარეობის შესაძლო დამძიმების შემთხვევაში ეს საკითხი პრობლემას წარმოქმნის, ვინაიდან, ადგილზე არსებული ჯგუფის მიერ პაციენტის მართვა არ იქნება საკმარისი. მაგალითად, ჩვენ მიერ აღმოჩენილი ვერნიკეს ენცეფალოპათია არ იყო დიაგნოსტირებული ნევროლოგის რეგულარული კონსულტაციის არარსებობის გამო.

შესაძლო გასტრო-ინტესტინალური სისხლდენის ალბათობის გამოკვლევის უცილებლობა, საჭიროების მიუხედავად, დღის წესრიგში არ დამდგარა. ჰიპოკალემიის ფონზე პაციენტის უწყვეტი კარდიო ტელემეტრიის აუცილებლობა არ განხილულა -— კარდიოლოგის მიერ პაციენტის შეუფასებლობის გამო", — აღნიშნულია დაკვნაში.

მათივე შეფასებით, დაწესებულებაში მუდმივად მორიგე რეანიმატოლოგის ხელმისაწვდომობა ქმნის უსაფრთხოების განცდას, რომელიც არ შეესაბამება რეალობას. ექიმების განცხადებით, იმის გათვალისწინებით, რომ პაციენტი საკმაოდ გამოფიტულია, რეანიმაციული ღონისძიებები, მათი საჭიროების დადგომის შემთხვევაში, მაღალი ალბათობით, არაეფექტური იქნება.

"ზოგიერთი სიცოცხლისთვის საშიში გართულების შემთხვევაში (მაგ: ინფარქტი, ინსულტი, თრომბოემბოლია), ადგილობრივი პერსონალის განმარტებით, იგეგმება პაციენტის გადაყვანა სხვა სამედიცინო დაწესებულებაში, რაც მისი მდგომარეობიდან გამომდინარე უკავშირდებოდა დაკარგულ დროს, რაც თავის მხრივ, კრიტიკულ საფრთხეს უქმნის პაციენტის სიცოცხლეს", — ვკითხულობთ მონიტორინგის შედეგებში.

ამასთან, აქვე აღნიშნულია, რომ პაციენტის სპეციფიკიდან გამომდინარე გადაუდებელი გადაყვანის გადაწყვეტილების მიღება საჭიროებს სხვადასხვა რგოლებს შორის ხანგრძლივ კოორდინაციას.

დასკვნის სახით კი ნათქვამია, რომ პაციენტის მდგომარეობის კრიტიკულობიდან გამომდინარე, მისი მკურნალობის გაგრძელება დაუყოვნებლივ რეკომენდებულია ფუნქციურად გამართულ და დიდი გამოცდილების მქონე პოლიპროფილურ ჰოსპიტალში, კერძოდ, ინტენსიური თერაპიის განყოფილებაში. ექიმების შეფასებით, ამ პირობებს მე-18 დაწესებულების კლინიკა არ აკმაყოფილებს.

გაიგეთ მეტი:

ექსპრეზიდენტის სამედიცინო მომსახურების მონიტორინგის მიზნით, სახალხო დამცველმა სამედიცინო ექსპერტთა ჯგუფი 17 ნოემბერს წარადგინა. ჯგუფის მიზანია შეაფასოს რამდენად შეესაბამება ექსპრეზიდენტის ჯანმრთელობის უფლების დაცვას N18 სამკურნალო დაწესებულება ამჟამად და იქნება თუ არა ამ დაწესებულებაში ადეკვატური სამედიცინო სერვისის მიწოდება შესაძლებელი პატიმრის მიერ ხანგრძლივი შიმშილობის შეწყვეტის შემდეგ, როგორც ამას ადამიანის უფლებათა ევროპული სასამართლო 10 ნოემბრის გადაწყვეტილებით ითხოვს.

სახალხო დამცველის მიერ შემქნილი ექიმთა კონსილიუმის წევრი არიან:

  • გიორგი გრიგოლია — ანესთეზიოლოგ-რეანიმატოლოგი;
  • გრიგოლი ხურციძე — შინაგანი სნეულებები/ჰოსპიტალური მედიცინა;
  • გიორგი კაჭარავა — კარდიოლოგი;
  • გიორგი პაპიაშვილი — კარდიოლოგი/არითმიოლოგი;
  • აიდა გოზალოვა — ჰემატოლოგი, კლინიკური ონკოლოგი, ინტერნისტი, პალიატიური მედიცინის სპეციალისტი;
  • მამუკა მაჩაიძე — ინფექციონისტი, თერაპევტი;
  • თენგო წულაძე — ნევროლოგი;
  • ნინო ზავრაშვილი — ენდოკრინოლოგი