2022 წლის 25 აპრილიდიან მსუბუქი ავტომობილის მძღოლებს მართვის მოწმობის გამოცდის ჩაბარება რეალურ პირობებში მოუწევთ. შესაბამისი კანონპროექტი პარლამენტმა დღეს დაამტკიცა. დარბაზში მყოფი 84 დეპუტატიდან კანონპროექტს მხარი 81-მა დაუჭირა, წინააღმდეგი არავინ ყოფილა.

"2022 წლის 25 აპრილიდან გახდება სავალდებულო რეალურ პირობებში მართვის მოწმობის გამოცდის ჩაბარება, ეს იქნება მხოლოდ "ბ" კატეგორია ავტომობილებისთვის, საუბარია მსუბუქ ავტომობილებზე, ხოლო 2022 წლის 7 ნოემბრიდან იქნება ყველასთვის სავალდებულო მართვის მოწმობის რეალურ პირობებში ჩაბარება", — განაცხადა პლენარულ სხდომაზე შინაგან საქმეთა მინისტრის მოადგილემ, ალექსანდრე დარახველიძემ.

კანონპროექტის განმარტებითი ბარათის მიხედვით, მართვის მოწმობის პრაქტიკული გამოცდა ხდება ორეტაპიანი.

"პირველი ეტაპი (სპეციალური მანევრები) ჩატარდება დახურულ საგამოცდო მოედანზე (როგორც ეს ამჟამადაც ხორციელდება), ხოლო მისი წარმატებით ჩაბარების შემთხვევაში, მეორე ეტაპი ჩატარდება რეალური საგზაო მოძრაობის პირობებში, წინასწარ შერჩეულ და საქართველოს შინაგან საქმეთა მინისტრის მიერ დამტკიცებულ მარშრუტებზე", — წერია დოკუმენტში.

აღსანიშნავია, ამავე კანონპროექტის მიხევდით, სავალდებულო გახდება მოპედების რეგისტრაცია და მათთვის მართვის მოწმობის ქონა.