იუსტიციის მინისტრის, რატი ბრეგაძის თქმით, მიხეილ სააკაშვილის გვიანობამდე დეპუტატები ჰყავდა სტუმრად და ამის შემდეგ, შესაძლოა, მას ეძინა. ასე ხსნის მინისტრი იმას, რომ გუშინ, 15 ნოემბერს ექსპრეზიდენტთან პირადი ექიმი, ნიკოლოზ ყიფშიძე არ შეუშვეს.

"გუშინ, გვიან ღამით, გააჩნია, რომელ საათზე, იმიტომ, რომ ძალიან გვიანობამდე ჰყავდა სტუმრად პარლამენტის წევრები და შესაძლებელია, ამის შემდეგ, უბრალოდ ეძინა პატიმარს და ამ მოტივით. დიახ, მე გითხარით, რომ მას ჰყავდა დეპუტატები, რომლებიც ძალიან გვიან გამოვიდნენ", — აცხადებს ის.

15 ნოემბერს, გვიან ღამით გლდანის დაწესებულებასთან მისულ ექიმს რამდენიმე წუთით ადრე შეატყობინეს, რომ ის სააკაშვილის სანახავად ვერ შევიდოდა. მისი თქმით, მიზეზები არ განუმარტავთ და უთხრეს, რომ მომდევნო დღეს მოსულიყო.

მიხეილ სააკაშვილი 47-ე დღეა შიმშილობს. სააკაშვილი, მისი ადვოკატები და არასამთავრობო ორგანიზაციის წარმომადგენლები მის სამოქალაქო კლინიკაში გადაყვანას ითხოვენ, თუმცა ხელისუფლება უარზეა. 8 ნოემბერს ექსპრეზიდენტი მისი და მისი ადვოკატების სურვილის საწინააღმდეგოდ გლდანის ციხის სამკურნალო დაწესებულებაში გადაიყვანეს.

სტრასბურგის სასამართლოს გადაწყვეტილების შემდეგ მან განაცხადა, რომ შიმშილობას შეწყვეტს, თუ სამოქალაქო კლინიკაში გადაიყვანენ. პასუხად იუსტიციის მინისტრმა თქვა, რომ მოხარული იქნებიან თუ არ იშიმშილებს, მაგრამ დათქმების გარეშე.

სააკაშვილის სამოქალაქო კლინიკაში გადაყვანის მოთხოვნით პეტიციაც შეიქმნა. ხელმომწერები პირობას დებენ, რომ იქამდე, სანამ სააკაშვილი ამ კლინიკაში იქნება, ტერიტორიასთან აქციას არ გამართავენ.