სამედიცინო სფეროს წარმომადგენლები ექსპრეზიდენტ მიხეილ სააკაშვილის სამოქალაქო კლინიკაში გადაყვანის მოთხოვნით განცხადებას ავრცელებენ და აღნიშნავენ, რომ პროფესიონალი ექიმებისთვის, ადამიანის სიცოცხლე და ღირსება უფრო მნიშვნელოვანია, ვიდრე ნებისმიერი პოლიტიკური პოზიცია თუ დაპირისპირება. მათი თქმით, შოკისმომგვრელია, რომ ციხის საავადმყოფოს ექიმები, ციხის ადმინისტრაცია და პოლიტიკურმა ხელმძღვანელობა ორკესტრირებულად მოქმედებენ სააკაშვილის ფიზიკური და პოლიტიკური ლიკვიდაციისთვის.

"პატივცემულო ქალბატონებო და ბატონებო: ჩვენ, საქართველოს სამედიცინო სფეროს წარმომადგენლები, ვითხოვთ თქვენს დაუყოვნებლივ მხარდაჭერას. პოლიტიკური სიტუაცია საქართველოში დიდი სისწრაფით მძიმდება, რაც ჩვენი ერის მიერ მძიმე ბრძოლით მოპოვებულ თავისუფლებასა და დემოკრატიასთან ერთად, სასიკვდილო საფრთხეს უქმნის საქართველოს ექს-პრეზიდენტის, მიხეილ სააკაშვილის ჯანმრთელობას", — ვკითხულობთ განცხადებაში.

ექიმები იმედს გამოთქვამენ, რომ საერთაშორისო მეგობრობა უყურადღებოდ არ დატოვებს ექსპრეზიდენტს და მოუწოდებენ მათ, გაუგზავნონ მთავრობას მკაფიო და მძიმე გზავნილი. მათივე თქმით, მზად არიან, მიაწოდონ ნებისმიერი დამატებითი მასალები, თუ საჭიროება ამას მოითხოვს.

"ჩვენ, ქართველი პროფესიონალები, ვისაც თავისუფალი, დემოკრატიული სამყარო მიგვაჩნია ჩვენი პლანეტის იმედისა და თავისუფლების მაგალითად, ვინც ვამაყობთ მისი ფასეულობებითა და პრინციპებით, მოგიწოდებთ, გაუგზავნოთ საქართველოს მთავრობას მძიმე და მკაფიო გზავნილი, რომ უზრუნველყონ პრეზიდენტ სააკაშვილის სიცოცხლის უფლება და დაუყოვნებლივ გადაიყვანონ სამოქალაქო კლინიკაში შესაბამისი სამედიცინო დახმარების მისაღებად. პრეზიდენტ სააკაშვილის სიცოცხლის უფლების უზრუნველყოფა, დააჩქარებს მომავალში საქართველოს სახელმწიფოს მხრიდან ადამიანის უფლებების, თავისუფლების პრინციპების და დემოკრატიის ერთგულებას", — ვკითხულობთ განცხადებაში.