ჯანდაცვის მინისტრის მოადგილის, თამარ გაბუნიას განცხადებით, იმუნიზაციის საბჭომ მხარი დაუჭირა 12-დან 15 წლამდე ბავშვების ვაქცინაციის პროცესს. მისი თქმით, ისინი მშობლის თანხმობით, შეძლებენ, რომ Pfizer-ის ორი დოზით აიცრან.

"საბჭომ მხარი დაუჭირა 12-დან 15 წლამდე ასაკობრივ ჯგუფში ვაქცინაციის პროცესს Pfirzer-ის ვაქცინის ორი დოზით. ამდენად მშობლის გადაწყვეტილებითა და თანხმობით, რაც გახლავთ აუცილებელი მოთხოვნა არასრულწლოვნებში სამედიცინო ჩარევის ჩატარების შემთხვევაში, 12-დან 15 წლამდე ბავშვებს, შეუძლიათ, მიმართონ ამცრელ ცენტრებს და უკვე მიიღონ ვაქცინაცია Pfizer-ის დოზით", — განაცხადა გაბუნიამ.

8 ნოემბერს საკოორდინაციო საბჭომ მიიღო გადაწყვეტილება, რომ პირველი დეკემბრიდან ე.წ. მწვანე პასპორტები ამოქმედდეს. როგორც პრემიერმინისტრმა, ირაკლი ღარიბაშვილმა ბრიფინგზე ისაუბრა, დეკემბრიდან მოქალაქეები კონკრეტულ დაწესებულებებში მწვანე პასპორტების გარეშე ვეღარ შევლენ, თუმცა ეს გავრცელდება დაწესებულებების სტუმრებზე და არა იქ მომუშავე პერსონალზე.

საქართველოში ამ დროისთვის 3 სხვადასხვა ვაქცინაა ხელმისაწვდომი, თუმცა ასტრაზენეკათი აცრა მხოლოდ იმ ადამიანებს შეუძლიათ, ვინც ერთი დოზა უკვე გაიკეთა.

უკვე შესაძლებელია ბუსტერითა და ჩანაცვლებით სარგებლობაც. დეტალები ნახეთ აქ: ვინ მიიღებს, როდის და როგორ — რა უნდა ვიცოდეთ ბუსტერსა და ჩანაცვლებაზე

ვაქცინაციისთვის დარეგისტრირება შეგიძლიათ ვებგვერდზე Booking.moh.gov.ge.

იხილეთ იმ დაწესებულებების ჩამონათვალი, სადაც შესაძლებელია ვაქცინაცია. სია პერიოდულად ახლდება და ადგილები ემატება.

ასევე, შეგიძლიათ ნახოთ იმ დაწესებულებების სია, სადაც აცრას წინასწარი რეგისტრაცის გარეშე შეძლებთ. გარდა ამისა, თბილისში მოქმედებს ვაქცინაციის მოძრავი პუნქტები.